સૌપ્રથમ ગોળને પાણીમાં પલાળીને ગોળનું પાણી તૈયાર રાખવું. હવે એક વાસણમાં ઘઉંનો લોટ, ઈલાયચી પાઉડર, મરી અને વરિયાળી ઉમેરીને બધું બરાબર હલાવી લેવું.

હવે તેમાં ગોળનું પાણી ઉમેરીને બરાબર હલાવી લેવું અને એકરસ મિશ્રણ બનાવી લેવું. હવે તેને ઢાંકીને ચાર કલાક માટે રહેવા દેવું. છ થી આઠ કલાક માટે પણ રાખી શકાય. વધારે વાર રહેવા દેવાથી આથો સારો આવે છે અને વધારે સરસ માલપુઆ બને છે. ચાર થી છ કલાક બાદ એમાં જરૂર જેટલું પાણી ઉમેરીને જાડી ધાર પાડી શકાય એવું ખીરું બનાવી લેવું. ખીરું પાતળું ના બની જાય એનું ખાસ ધ્યાન રાખવું. મેં લગભગ પા કપ થી થોડું વધારે પાણી ઉમેર્યું છે.

હવે એક સપાટ ફ્રાઇંગ પેનમાં તેલ લઈને મીડીયમ તાપે ગરમ કરવું. તેલ ગરમ થાય એટલે એક ગોળ ચમચાની મદદથી થોડું ખીરું લઈને વચ્ચે મૂકવું. ખીરું ને ગોળ પાથરવાની જરૂર નથી એની જાતે જ ગોળ માલપુઆ નો આકાર બની જાય છે. હવે બંને તરફથી ગોલ્ડન કલરનું તળી લેવું. આ માલપુઆ ની કિનારીઓ ક્રિસ્પી અને વચ્ચેથી પોચા બને છે.