સૌપ્રથમ એક જાડા તળિયાવાળા વાસણમાં તેલ ગરમ કરી એમાં કોપરાની કાતરી ધીમા તાપ પર હલકા ગુલાબી રંગની તળી લેવી. કોપરાની કાતરી બળી ના જાય એ વાતનું ખાસ ધ્યાન રાખવું. કોપરાની કાતરી કાઢીને એમાં શિંગદાણા ઉમેરીને તેલમાં શેકી લેવા અને બહાર કાઢી લેવા.

હવે એ જ તેલમાં રાઈ ઉમેરવી. રાઈ ફૂટે એટલે તેમાં લીલા મરચાના ટુકડા અને કરી પત્તા ઉમેરીને સાંતળી લેવા. હવે તેમાં દાળિયા ઉમેરીને દાળિયા ને હલકા ગુલાબી રંગના શેકી લેવા. ત્યારબાદ તેમાં હળદર, મીઠું, શિંગદાણા અને કોપરાની કાતરી ઉમેરીને બધું બરાબર હલાવી લેવું.

પૌવાને પહેલેથી તાપમાં તપાવીને રાખવા અથવા તો ધીમા તાપે શેકી લેવા જેથી કરીને પૌવા ક્રિસ્પી બની જાય. હવે પૌવાને પોટમાં ઉમેરીને બધું બરાબર હલાવી લેવું. થોડીવાર માટે મીડીયમ તાપ પર ગરમ થવા દેવું. તૈયાર થયેલા પૌવાના ચેવડાને ઠંડો પાડીને એર ટાઈટ કન્ટેનરમાં ભરી લેવો.