સૌપ્રથમ મગની દાળને ધોઈને બે કલાક માટે પલાળી રાખવી. લોટમાં તેલ અને મીઠું ભેગું કરીને થોડું થોડું પાણી ઉમેરતા જઈને રોટલી થી થોડો કઠણ એવો લોટ બાંધી લેવો. લોટને ઢાંકીને 15 મિનિટ માટે રહેવા દેવો. લોટને એક સરખા 12 ભાગમાં વહેંચી લેવો.

જીરુ, આખા ધાણા અને વરીયાળીને અધકચરા વાટી લેવા. હવે એક પેનમાં તેલ ગરમ થાય એટલે તેમાં વાટેલો મસાલો લીલા મરચા, આદુ અને હિંગ ઉમેરીને એક મિનિટ માટે મીડીયમ તાપ પર સાંતળવું. ત્યારબાદ તેમાં હળદર, લાલ મરચું, ગરમ મસાલો, આમચૂર અને મીઠું ઉમેરીને બધું બરાબર હલાવી લેવું.

હવે તેમાં પલાળેલી મગની દાળ ઉમેરીને બરાબર હલાવીને એક કપ પાણી ઉમેરવું. ત્યારબાદ મીડીયમ તાપ પર ઢાંકીને બધું પાણી ઉડી જાય અને દાળ પોચી થાય ત્યાં સુધી પકાવવું. હવે તેમાં લીલા ધાણા ઉમેરીને બધું બરાબર હલાવી લેવું. ફીલિંગ ને એકદમ ઠંડુ કરી લેવું.

લોટના એક લુવાને લઈને સૂકા લોટમાં રગદોળીને ચાર ઇંચ જેટલું વણી લેવું. હવે એના મધ્યમાં તૈયાર કરેલું ફીલિંગ મૂકીને કિનારીઓને વચ્ચે ભેગી કરીને બંધ કરી લેવું. હવે ફરી લોટમાં રગદોળીને ગોળ વણી લેવું.

રોટલી ની તવી ગરમ થાય એટલે તેમાં વણેલા પરાઠાને મૂકીને નીચેની તરફથી હલકું ગુલાબી થાય ત્યાં સુધી શેકવું. ત્યારબાદ તેને પલટાવી લેવું. હવે નીચેની તરફથી બરાબર શેકાય એટલે ઉપરની તરફ થોડું તેલ ઉમેરીને પલટાવી લેવું. ત્યાં પણ થોડું તેલ ઉમેરીને બંને બાજુથી શેકી લેવું. આ રીતે બધા પરાઠા તૈયાર કરી લેવા.

મગની દાળના પરાઠાને અથાણા, ચટણી, દહી વગેરે સાથે નાસ્તામાં અથવા તો ભોજન તરીકે પીરસી શકાય.