સૌ પ્રથમ ચોખા, ચણાની દાળ, અડદની દાળ તથા મગની મોગર દાળને પાણીથી ધોઈને તેમાં સૂકા મેથીનાં દાણા નાખી ૫-૬ કલાક પાણીમાં પલાળી રાખો.

ત્યારબાદ દાળચોખાનાં મિશ્રણને મિક્ષર જારમાં લઈને તેમાં દહીં નાખીને વાટી લો. આ રીતે ખીરૂ તૈયાર થાય તેને ૬-૭ કલાક ઢાંકીને મૂકી રાખો. જેથી સરસ આથો આવી જશે. પછી ઢાંકણ ખોલીને બરાબર મિક્સ કરી લો.

ઢોકળા બનાવવા માટે ઢોકળિયામાં પાણી ગરમ કરવા મૂકો, પાણી ગરમ થાય પછી ઢોકળાની થાળીને તેલથી ગ્રીસ કરી લો. તૈયાર કરેલુ ખીરૂ જો વધારે ઘટ્ટ લાગે તો જરૂર મુજબ પાણી ઉમેરી શકો છો. તેમાં આદુ-મરચાની પેસ્ટ, હળદર, મીઠું ઉમેરી મિક્સ કરી લો. ત્યારબાદ તેમાં કુકિંગ સોડા અને ૨ ચમચી ગરમ કરેલું તેલ ઉમેરીને હલકા હાથે મિક્સ કરી ફીણી લેવું જેથી ખીરૂ એકદમ હલકું થઈ જશે.

આ રીતે તૈયાર થયેલા ખીરાને ઢોકળાની થાળીમાં રેડીને ઉપર લાલ મરચું ભભરાવીને ૧૦ મિનિટ સ્ટીમ કરો. પછી તેને બહાર કાઢીને ઉપર કાચુ સીંગતેલ લગાવી કાપા પાડીને ગરમાગરમ ઢોકળા ગ્રીન ચટણી તથા રેડ ચટણી સાથે સર્વ કરો. તો તૈયાર છે ઢોકળા.