பாகற்காய் கருப்பு கள்ளை சாம்பார்

அரை கப் துவரம் பருப்பை கழுவி 3 கப் தண்ணீர் சேர்த்து குக்கரில் வைக்கவும் அதில் கால் ஸ்பூன் மஞ்சள் தூள் கால் ஸ்பூன் விளக்கெண்ணெய் சேர்த்து குழைய வேக வைத்துக் கொள்ளவும். பாகற்காயை அரிசி கழுவிய தண்ணீரில் வட்ட வடிவில் அரிந்து போட்டு வைக்கவும். பத்து சிறிய வெங்காயத்தை தோலுரித்து நீளவாக்கில் இரண்டாக அரிந்து கொள்ளவும். தக்காளியைப் பொடியாக அரிந்து கொள்ளவும். எலுமிச்சைப்பழ அளவு புளியை ஊற வைத்து கரைத்து வைத்துக் கொள்ளவும்.கொண்டைக்கடலையை முதல் நாளே ஊற வைத்து 6 அல்லது 7 சவுண்டு விட்டு வேக வைத்துக் கொள்ளவும்.

பிரஸர் பான்,அல்லது ஒரு வாணலியில் ஒரு ஸ்பூன் எண்ணெய் சேர்த்து அதில் கடுகு உளுத்தம் பருப்பு பெருங்காயத் தூள் வரமிளகாய் கருவேப்பிலை தாளித்துக் கொள்ளவும். பாவக்காய் சேர்த்து வதக்கவும். பின்பு அரிந்த வெங்காயம், தக்காளி சேர்த்து வதக்கிக் கொள்ளவும். கரைத்து வைத்த புளியை கொஞ்சம் தண்ணீர் சேர்த்து சாம்பார் தூள் உப்பு சேர்த்து கொதிக்க விடவும்.

கொதித்த புளி தண்ணீரில் நல்லெண்ணெய் ஒரு ஸ்பூன் சேர்த்து வதக்கிய காய்களையும் சேர்த்து மூடி வைத்து வேக விடவும். காய் வெந்தவுடன் வேக வைத்த பருப்பை சேர்த்து கொள்ளவும். ஒரு கொதி விடவும். வேக வைத்த கொண்டை கடலையை சேர்த்து கொள்ளவும். ஒரு ஸ்பூன் தேங்காய் துருவல் சேர்த்து கொதிக்க விடவும். கடைசியில் வெல்லம் அல்லது சர்க்கரை சேர்த்துக் கொள்ளவும்

சுவையான பாகற்காய் கொண்டைக்கடலை சாம்பார் தயார் சாதத்தில் ஊற்றி நல்லெண்ணெய் சேர்த்து பிசைந்து சாப்பிட சுவையாக இருக்கும். வடகம் அப்பளம் போன்றவை தொட்டுக் கொள்ள சுவையாக இருக்கும். இந்த குழம்பிற்கு ப புளி கொஞ்சம் அதிகம் சேர்த்துக் கொள்ளவும்.