முதலில் முக்கால் கப் பச்சை அரிசியை நன்கு கழுவி முக்கால் மணி நேரம் வரை ஊற வைத்துக் கொள்ளவும். அரை கப் துவரம் பருப்பை மஞ்சள், கால் ஸ்பூன் விளக்கெண்ணெய் சேர்த்து குக்கரில் குழைய வேக வைத்துக் கொள்ளவும். கீரையை ஆய்ந்து கழுவி ஒன்றிரண்டாக அரிந்து கொள்ளவும். சின்ன வெங்காயம் தக்காளியை அரிந்து வைத்துக்கொள்ளவும். சிறிய எலுமிச்சை அளவு புளியை ஊறவைத்து கரைத்து வைத்துக் கொள்க.

ஒரு வாணலியில் ஒரு ஸ்பூன் எண்ணெய் சேர்த்து அதில் கடுகு, வரமிளகாய், ஒரு சிறிய அளவு பட்டை, 2 கிராம்பு,1/2 ஸ்பூன் சீரகம், கால் ஸ்பூன் வரக்கொத்தமல்லி சேர்த்து தாளித்துக் கொள்ளவும். பின்பு அதில் தோல் உரித்த சிறிய வெங்காயம், தக்காளி அரிந்தது சேர்த்து நன்கு வதக்கிக் கொள்ளவும். பின்பு அரிந்த கீரையை சேர்த்து 2 நிமிடம் வதக்கி கொள்ளவும்.இப்போது அரை ஸ்பூன் சாம்பார் தூள், ஒரு ஸ்பூன் வர மிளகாய் தூள், இரண்டு ஸ்பூன் கொத்தமல்லி தூள் சேர்த்து ஒரு நிமிடம் பச்சை வாசம் போகும் வரை வதக்கிக் கொள்ளவும்.

இப்போது வேகவைத்த பருப்பை இதில் சேர்த்து கொள்ளவும். நன்கு ஊறிய பச்சை அரிசியை தண்ணீர் வடித்து சேர்த்து கொள்ளவும். ஒரு டம்ளர் அரிசிக்கு 3 டம்ளர் தண்ணீர் வீதம் தண்ணீர் சேர்த்துக் கொள்ளவும். உப்பு தேவையான அளவு சேர்த்து கொள்ளவும்.நன்கு கலந்துவிட்டு ஒரு பாத்திரத்தில் சேர்த்து குக்கரில் வைத்து 3 விசில் விடவும். பிறகு மிதமான தீயில் 5 நிமிடம் வைத்திருக்கவும். அடுப்பை நிறுத்தி விடவும்.

குக்கரில் ஆவி அடங்கியவுடன்பாத்திரத்தை வெளியில் எடுத்து அதில் கரைத்து வைத்த கெட்டியான புளித்தண்ணீரை சேர்த்து 5 நிமிடம் வரை கொதிக்க விடவும்.சாதம் கொழ கொழப்பாக இருந்தால் தான் மிகவும் சுவைாக இருக்கும்.1/2 ஸ்பூன் சர்க்கரை சேர்த்துக் கொள்ளவும். கடைசியாக இரண்டு ஸ்பூன் நெய் சேர்த்துக் கொள்ளவும். சுவையான கீரை சாம்பார் சாதம் தயார். தொட்டு கொள்ள அப்பளம், வடகம், சிப்ஸ் போன்றவை சுவையாக இருக்கும்.