படத்தில் காட்டியுள்ளபடி மீடியம் சைஸ் கத்தரிக் காயை அடுப்பை பற்ற வைத்து சுட்டுக் கொள்ளவும். பெரிய கத்திரி காயில் செய்தால் நீங்கள் சேர்த்துக் கொள்ளும் கத்திரிக்காய்க்கு தகுந்த அளவிற்கு மற்ற தேவையான பொருட்களை சேர்த்துக் கொள்ளவும். கத்திரிக்காயை எல்லா புறமும் நன்றாக திருப்பி வைத்து சுட்டுக் கொள்ளவும். கத்திரிக்காய் சுடுவதற்கு முன் எண்ணெய் தடவி சுட்டால் சுவையாக இருக்கும். கத்திரிக்காய் வெந்து விட்டதா என்று டூத் பீக் வைத்து செக் செய்யவும்.

கத்திரிக்காயை ஆறியவுடன் தோலை நீக்கி கத்திரிக்காய் நன்றாக இருக்கிறதா என்று பார்த்துக் கொள்ளவும். (சிலசமயம் புழு இருக்கும்.) கத்திரிக்காய் சதையை தனியாக எடுத்து வைத்துக் கொள்ளவும். ஒரு அரிந்த வெங்காயம், அரை தக்காளி, 5 கறிவேப்பிலை இலை, கொஞ்சம் கொத்தமல்லி, உப்பு தேவையான அளவு, கோலி குண்டு அளவு புளி எடுத்து வைத்துக் கொள்ளவும். ஒரு வாணலியில் ஒரு டேபிள்ஸ்பூன் எண்ணெய் சேர்த்து அதில் உளுத்தம் பருப்பு கடலை பருப்பு சேர்த்து லேசாக சிவக்க விடவும்.

பிறகு அதில் 4 வர மிளகாயை சேர்த்து சிவக்க வறுத்துக் கொள்ளவும். இப்போது அரிந்த தக்காளி வெங்காயம் சேர்த்து நன்கு வதக்கிக் கொள்ளவும். உப்பு, புளி சேர்த்துக் கொள்ளவும். எல்லாவற்றையும் ஆறவைத்து மிக்ஸி ஜாரில் சேர்த்து அரைக்க தயார் செய்து கொள்ளவும்.

இப்போது எல்லாவற்றையும் மிக்ஸியில் சேர்த்து மிகவும் நைசாக அரைத்துக் கொள்ளவும். (தண்ணீர் சேர்க்க வேண்டாம்)கால் ஸ்பூன் எண்ணெய் சேர்த்து அதில் கடுகு உளுத்தம் பருப்பு கறிவேப்பிலை தாளித்து சட்னியில் சேர்த்து கலந்து கொள்ளவும். சுவையான கத்தரிக்காய் சட்னி தயார். இட்லி தோசை சப்பாத்திக்கு தொட்டுக் கொள்ள சுவையாக இருக்கும்.