उंधियु साठी लागणार्या सर्व भाज्या एकत्र एके ठिकाणी जमा करून घ्या. नंतर स्वच्छ धुऊन घ्या आणि कोरड्या करून सर्व भाज्या निवडून ठेवा,एकीकडे लसूण पात आलं मिरची कोथिंबीर यांची पेस्ट करून ठेवा. थोडी पात वेगळी काढून ठेवा. आपल्याला भाजीत घालायची आहे. ओलं खोबरं कोथिंबीर आलं लसूण मिरची,साखर, लिंबूरस आणि तीळ यांची देखील मिक्सर मधून बारीक पेस्ट करून ठेवा.या पेस्टमध्ये धणे जीरे पूड,गरम मसाला, तिखट,मीठ घालून व्यवस्थित एकजीव करा..हा झाला आपला भाज्यांना मॅरिनेट करायचा मसाला..

पापडी सुरती पापडी वालाच्या शेंगा मटार पावटा हरभरे यांना थोडे तेल आणि खायचा सोडा लावून ठेवावे. पंधरा ते वीस मिनिटांनी या सर्व भाज्या कुकरमध्ये शिटी न लावता बारीक गॅसवर दहा ते बारा मिनिटे उकडून घ्याव्यात आणि नंतर या भाज्यांना थोडा मसाला लावून ठेवावा.

बटाटे सुरण रताळी कोनफळ त्यांची साले काढून मोठ्या फोडी करून घ्याव्यात आणि तळून घ्यावेत आणि थोडा मसाला लावून मॅरिनेट करून ठेवा.वांगी मध्ये चीर देऊन चिरून ठेवावी त्यात मसाला, बारीक चिरलेली लसूणपात भरून ठेवा थोड्या तेलावर शिजवून ठेवा..केळी मध्यम आकाराची चिरावीत.. तेलामध्ये थोडी तळून घ्या..

आता एका पातेल्यातकिंवा प्रेशर पॅनमध्ये भाज्या तळलेले तेल घ्या. त्यात ओवा आले लसूण पेस्ट हळद घालून खमंग फोडणी करून घ्या. आता प्रथम फोडणीवर उकडलेल्या पापडी शेंगा सर्व दाणे घालावेत थोडे परतावे यावर ओला मसाला मीठ घालून एक ते दोन वाफा काढाव्यात.

नंतर यावर बटाटे सुरण कोनफळ रताळी या मसाला लावलेल्या भाज्यांचा दुसरा थर घालावा आणि थोडं परतून त्यावर मसाल्याचे वाटण मीठ व पाणी घालावे आणि भाजीला एक दोन वाफा आणाव्यात वरून तळलेल्या केळ्याच्या फोडी घालाव्यात त्यावर मसाला घालावा पुन्हा एक दोन वाफा काढाव्यात आणि भाजी व्यवस्थित मिक्स करून घ्यावी.

आता सर्वात शेवटी भरलेली वांगी घालावी आणि उरलेले मसाल्याचे वाटण मीठ, पाणी घालून भाजी व्यवस्थित मिक्स करा आणि मीठाचा अंदाज घेऊन गरज असल्यास पुन्हा मीठ घाला आणि भाजी व्यवस्थित तळापासून ढवळा. वरून तळलेले मेथीचे मुठिया घाला..8-10मुठिया कुस्करुन घाला. चिरलेली कोथिंबीर घाला..आणि झाकण ठेवून 15 ते 20 मिनिटे मंद आचेवर सुरती उंधियु शिजण्यास ठेवावा.भाज्या शिजताना भाज्या,मसाले, मुठिया यांचा हळूहळू घरभर सुगंध असा पसरत जातो की बास..भूक चाळवली गेलीच पाहिजे..