સૌપ્રથમ પાલક ને સાફ કરી બરાબર ધોઈ લેવી જેથી કરીને એમાં કોઈ જ પ્રકારની રેતી કે માટી ના રહી જાય. એક વાસણમાં પાણી ગરમ થવા માટે મૂકવું. પાણી ઉકળવા માંડે એટલે એમાં પાલક ઉમેરી એક મિનિટ માટે બાફી લેવી. હવે બાફેલી પાલકને બરફવાળા ઠંડા પાણીમાં લઈ લેવી. પાલકને બરફવાળા પાણીમાં ઉમેરવાથી એનો રંગ જળવાઈ રહે છે.

બે મિનીટ પછી પાલકને પાણીમાંથી કાઢી લઈને એક મિક્સર જાર માં નાખી એની સ્મૂધ પેસ્ટ બનાવી લેવી.

એક પોટ માં ઘી અને તેલ મિક્સ કરી ગરમ કરવા મૂકવું. હવે તેમાં બારીક સમારેલા કાંદા ઉમેરવા. કાંદા ગુલાબી રંગના થાય એટલે એમાં આદુ, મરચાં અને લસણ ની પેસ્ટ ઉમેરીને 2 મિનીટ સુધી સાંતળવું. હવે તેમાં ધાણાજીરું, ગરમ મસાલો, કસૂરી મેથી અને મીઠું ઉમેરી બરાબર મિક્ષ કરી લેવું. આ મિશ્રણમાં બારીક સમારેલા ટામેટાં અને અડધો કપ પાણી ઉમેરી બધું બરાબર મિક્સ કરી લેવું.

ટામેટા એકદમ ચડી જાય અને તેલ છૂટું પડવા માંડે એટલે એમાં પાલકની પેસ્ટ અને અડધો કપ પાણી ઉમેરવા. મધ્યમ તાપે ૩ થી ૪ મિનીટ માટે પકાવવું. હવે તેમાં પનીરના ટુકડા ઉમેરવા. ધીમા તાપે ૫ થી ૭ મિનીટ માટે પકાવવું. તાજી મલાઈ ઉમેરીને ગેસ બંધ કરી દેવો.