લીલા મરચા ને ધોઈ, કોરા કરી અડધા ઈંચના ટુકડા માં કાપી લેવા. જાડા અને મીડીયમ તીખાશ વાળા મરચા પસંદ કરવા. હવે એક પેનમાં તેલ મૂકી ને એમાં રાઈ ઉમેરવી. રાઈ ફૂટે એટલે તેમાં હિંગ, જીરૂ, વરિયાળી ઉમેરી હલકો ગુલાબી રંગ થાય એટલે એમાં મરચાના ટુકડા ઉમેરી દેવા. મરચાના ટુકડા ને એક મિનિટ માટે મિડીયમ તાપ પર સાંતળીને તેમાં હળદર, મીઠું, ધાણાજીરું, આમચૂર અને વરિયાળી નો પાઉડર ઉમેરી બધું બરાબર હલાવી લેવું.

હવે તેને ઢાંકીને મિડીયમ તાપ પર બે થી ત્રણ મિનિટ સુધી રહેવા દેવું, ત્યાર બાદ બધુ બરાબર હલાવીને ગેસ બંધ કરી દેવો. જો મરચામાં પાણીનો ભાગ દેખાય તો બધું બરાબર સુકાવા દેવું. આ મરચાં ને એરટાઈટ કન્ટેનરમાં ભરી ને અઠવાડિયા સુધી ફ્રિજમાં સ્ટોર કરી શકાય છે.

ખોબા રોટી બનાવવા માટે એક વાસણમાં ઘઉંનો લોટ, રવો, મીઠું, અજમા અને ઘી ઉમેરી બરાબર મિક્સ કરવું. હવે તેમાં થોડું-થોડું પાણી ઉમેરતા જઈ ને કઠણ લોટ બાંધવો. આ લોટને ઢાંકીને 20 થી 30 મિનિટ માટે રહેવા દેવો. જો ઘઉં નો જાડો લોટ હોય તો રવો ઉમેરવો નહીં.

લોટના ત્રણ એક સરખા ભાગ કરીને એમાંથી પા થી અડધા ઇંચ ની જાડાઈ ની રોટલી વણી લેવી. હવે તેને ઊંધી કરીને તેમા હલકા હાથે ચપ્પુની મદદથી કાપા કરવા.

કાપા કરેલો ભાગ નીચે રાખીને ઉપરની તરફ મનપસંદ ડિઝાઇન બનાવવી. ડિઝાઇન બનાવવા માટે મેં અહીંયા પ્લકર અને ચીપિયા નો ઉપયોગ કર્યો છે.

મેં અહીંયા ત્રણ જાતની અલગ અલગ ડિઝાઇન બનાવી છે. તમે તમારી પસંદગી મુજબની કોઈપણ પ્રકારની ડિઝાઈન બનાવી શકો. ટ્રેડિશનલી રોટલી એક બાજુ શેકાતી હોય ત્યારે ઉપરની તરફ હાથથી જ ચપટી લઈને ડિઝાઈન બનાવવામાં આવે છે પરંતુ આપણે વારંવાર ન બનાવતા હોવાથી એ રીતે ડિઝાઇન બનાવવું થોડું અઘરું પડે છે, તેથી મેં પહેલા જ ડિઝાઈન બનાવી લીધી છે અને પછી રોટલી ને શેકી છે.

હવે ડિઝાઇન વાળી બાજુ ઉપરની તરફ રહે એ રીતે રોટીને તવીમાં શેકવા માટે મૂકવી. ધીમા થી મીડીયમ તાપ પર રોટી ને બરાબર શેકાવા દેવી ત્યારબાદ તેને પલટાવી લેવી. બીજી બાજુ પણ ધીમા થી મીડીયમ તાપ પર રોટી ને શેકાવા દેવી. એક રોટી તૈયાર થતાં લગભગ ૧૦ થી ૧૨ મિનીટ લાગે છે તેથી ધીરજથી ધીમા તાપે શેકવી નહીંતર અંદરથી કાચી અને ઉપરથી બળી જવાની શક્યતા રહે છે.

પાપડને શેકીને એના ટુકડા કરી લેવા. એક પેનમાં તેલ ગરમ થાય એટલે તેમાં જીરું ઉમેરવું. જીરું બ્રાઉન કલરનું થાય એટલે તેમાં હિંગ અને આદુ મરચાં લસણની પેસ્ટ ઉમેરીને બરાબર હલાવી લેવું અને હલકા ગુલાબી રંગ નું થાય ત્યાં સુધી સાંતળવું.

હવે તેમાં ટામેટાની પેસ્ટ ઉમેરીને મીડીયમ તાપ પર જ્યાં સુધી ટામેટા માંથી તેલ છૂટું પડે ત્યાં સુધી પકાવવું. હવે તેમાં હળદર, મીઠું, મરચું, ધાણાજીરું અને કસુરી મેથી ઉમેરીને હલાવી લેવું. એક વાસણમાં દહીં અને પાણીને બરાબર હલાવીને એકરસ કરી લેવું ત્યારબાદ એને ટામેટાની ગ્રેવીમાં ઉમેરવું. તાપ એકદમ ધીમો રાખીને સતત હલાવતા રહેવું જેથી કરીને દહીં ફાટી ના જાય.

જ્યારે ગ્રેવી ઉકળવા માંડે ત્યારે તેમાં પાપડના ટુકડા ઉમેરી દેવા અને બધું બરાબર હલાવીને બે થી ત્રણ મિનિટ માટે મીડીયમ તાપે પકાવવું. લીલા ધાણા મિક્સ કરીને ગેસ બંધ કરી દેવો.

દહીં પાપડ ની સબ્જી ગરમ જ પીરસવી.

સૌપ્રથમ રોટી નો લોટ બાંધીને ત્યારબાદ બીજી બધી તૈયારીઓ કરવી અને રોટી બનાવતી વખતે સબ્જી પણ બનાવી શકાય કેમ કે રોટી શેકાતા ઘણી વાર લાગે છે, એટલા સમય માં બીજી બધી તૈયારીઓ આસાનીથી થઈ જાય છે.