સૌ પ્રથમ બેસનનું ખીરૂ તૈયાર કરવા માટે એક બાઉલમાં બેસન લઈ તેમાં અજમો હથેળીથી મસળીને ઉમેરો, તેમાં હળદર, હીંગ તથા મીઠું ઉમેરીને જરૂર મુજબ થોડું-થોડું પાણી ઉમેરીને મરચા પર કોટીંગ થઈ શકે તેવું મધ્યમ ઘટ્ટ ખીરૂ તૈયાર કરો.

હવે સ્ટફિંગ બનાવવા માટે બાફેલા બટાકાને છોલીને મેશ કરી લો. એક ફ્રાયપેનમાં તેલ મૂકી ગરમ થાય પછી તેમાં જીરૂં ઉમેરી તતડે પછી આદુ-મરચાંની પેસ્ટ ઉમેરી બાફેલા બટાકાનો માવો તેમાં ઉમેરી મિક્સ કરો. તેમાં ગરમ મસાલો, મીઠું, હળદર, ખાંડ ઉમેરી મિક્સ કરો. ગેસ બંધ કરતી વખતે તેમાં લીંબુનો રસ અને સમારેલી કોથમીર ઉમેરી મિક્સ કરો. ભાવનગરી લીલા મરચાંની વચ્ચેથી ઉભા ચીરી લો તેમાં જો વધારે પાકટ બી હોય તો કાઢી લો, ત્યારબાદ તેમાં બટાકાનું બનાવેલું સ્ટફિંગ મરચામાં ભરો આ રીતે બધાજ મરચાં સ્ટફિંગ ભરીને તૈયાર કરો.

કઢાઈમાં તળવા માટે તેલ ગરમ કરવા મૂકો. બેસનનાં ખીરામાં ચપટી કુકિંગ સોડા અને થોડું પાણી ઉમેરી ખીરાને હાથથી ફીણીને હલકું કરો.

પછી તેમાં સ્ટફ કરેલા મરચાંને ખીરામાં બોળી કોટીંગ કરી ગરમ તેલમાં ગોલ્ડન રંગનાં તળો.