એક વાસણમાં હુંફાળું પાણી, હૂંફાળું દૂધ, યીસ્ટ, ખાંડ અને તેલ ભેગા કરી લેવા. હવે તેને પાંચ થી દસ મિનિટ માટે રહેવા દેવું.

એક મોટા વાસણમાં મેંદો, કોર્નફ્લોર, મીઠું અને બેકિંગ પાઉડર ઉમેરીને બરાબર હલાવી લેવું. હવે તેમાં યીસ્ટ નું મિશ્રણ ઉમેરીને લોટ બાંધી લેવો. લોટને લગભગ ૮ થી ૧૦ મિનિટ માટે મસળવો જેથી કરીને એકદમ મુલાયમ અને ઇલાસ્ટિક બની જાય. હવે લોટને ઢાંકીને બે કલાક માટે હુંફાળી જગ્યા પર રહેવા દેવો.

બે કલાક પછી લોટ ફૂલીને લગભગ સાઈઝમાં ડબલ થઈ જશે. હવે લોટને એક વર્ક ટોપ પર લઈને થોડા સૂકા લોટની મદદથી એક મોટું ગોળાકારમાં વણી લેવું. હવે તેના પર થોડું તેલ લગાવી લેવું.

સ્ટીલ ના ગ્લાસ અથવા તો કૂકી કટર વડે નાના ગોળાકાર કાપી લેવા. બાકીનો લોટ લઈ એને ફરીથી વણી ને એના પર તેલ લગાડીને પાછા એમાંથી નાના ગોળાકાર બનાવી લેવા. આ રીતે લગભગ 14 થી 16 ગોળાકાર બનશે. લોટ પર તેલ લગાવવું ખૂબ જ જરૂરી છે જેથી કરીને સ્ટીમ થયા પછી બન બંને બાજુ ચોંટી ના જાય. હવે દરેક ગોળાકારને અલગ અલગ બેકિંગ પેપર પર મૂકી એને અર્ધ ચંદ્રાકાર માં વાળી લેવા. હવે તેને હાથથી અથવા તો વેલણથી એકદમ હલકા હાથે દબાવી લેવા. ઢાંકીને 30 મિનિટ માટે રેસ્ટ કરવા દેવું.

એક સ્ટીમરમાં પાણી ગરમ થાય એટલે એમાં તૈયાર કરેલા બન્સ સ્ટીમ કરવા મુકવા અને લગભગ 8 થી 10 મિનિટ માટે મીડીયમ હિટ પર સ્ટીમ કરવા. ગેસ બંધ કરીને ત્રણ થી ચાર મિનિટ સુધી એમને એમ રહેવા દેવા ત્યારબાદ ઢાંકણ ખોલવું. ઢાંકણ ને કોઈપણ કોટનના કપડાં વડે બાંધવું જેથી કરીને વરાળ ના ટીપાં બન ઉપર પડે નહીં. સ્ટીમર ના સાઈઝ પ્રમાણે એક સમયે થોડા થોડા બન સ્ટીમ કરવા. આ રીતે બધા બન સ્ટીમ કરી લેવા.

હવે બન ને સ્ટીમર માંથી કાઢી લઈને બેકિંગ પેપર કાઢી લેવું અને વાયર રેક પર મૂકી દેવા. આ રીતે બધા બન રેક પર લઈ લેવા.

મશરૂમનું ફીલિંગ બનાવવા માટે એક પેનમાં તેલ અને બટર ગરમ થાય એટલે તેમાં કાંદા ઉમેરવા. બે મિનિટ માટે સાંતળીને એમાં આદુ, મરચાં અને લસણની પેસ્ટ ઉમેરીને એક મિનિટ માટે પકાવવું. હવે તેમાં બારીક સમારેલા કેપ્સીકમ ઉમેરીને બીજી એક મિનિટ માટે પકાવવું. હવે તેમાં મશરૂમ, મીઠું, મરી, સોયા સૉસ અને ચીલી સૉસ ઉમેરીને બધું બરાબર હલાવી લેવું.

મશરૂમમાંથી છૂટેલું બધું પાણી ઉડી જાય ત્યાં સુધી પકાવવું. હવે તેમાં બારીક સમારેલા લીલા ધાણા અથવા તો લીલી ડુંગળી ઉમેરીને ગેસ બંધ કરી દેવો.

હવે તૈયાર કરેલા બન ને ખોલીને એની અંદર તૈયાર કરેલું મશરૂમનું ફીલિંગ ઉમેરવું. બાઓ બનમાં પસંદગી પ્રમાણેનું કોઈપણ પ્રકારનું વેજીટેરિયન કે નોન વેજીટેરિયન ફીલિંગ ભરી શકાય છે.આ બન ને પ્લેન બટર સાથે પણ પીરસી શકાય છે.