રીંગણને ધોઈને લૂછીને એના પર ત્રણ ચીરા કરવા. હવે આ ચીરામાં લીલા મરચાં અને લસણ ભરી દેવા. રીંગણ પર થોડું તેલ લગાવીને રીંગણને એક જાળી મૂકીને ગેસ પર બરાબર શેકી લેવું.

ટામેટા પર થોડું તેલ લગાવીને ટામેટા કાળા રંગના થાય ત્યાં સુધી શેકી લેવા. હવે રીંગણ અને ટામેટાની છાલ ઉતારીને એક વાસણમાં બટાકાની સાથે ઉમેરવા.

રીંગણ અને ટામેટા ની ઉપર ચપ્પુ ફેરવવાથી આસાનીથી કપાઈ જશે. હવે ચોખા માટેની બધી સામગ્રી ઉમેરીને હલાવી લેવું. હવે એક મેશર ની મદદથી બધું બરાબર મિક્સ કરીને બાજુ પર રહેવા દેવું.

લીટી બનાવવા માટે લોટ, મીઠું, અજમા, તેલ અને બેકિંગ સોડાને એક વાસણમાં ઉમેરવા. હવે થોડું થોડું પાણી લઈને થોડો કઠણ લોટ બાંધી લેવો, વધારે પડતો કઠણ લોટ બાંધવો નહીં. બરાબર મસળીને ઢાંકીને 15 મિનિટ માટે રહેવા દેવો.

ફીલિંગ બનાવવા માટેની બધી સામગ્રીને એક વાસણમાં ઉમેરીને બરાબર હલાવી લેવું. આ ફીલિંગ બહુ સૂકું નહીં કે બહુ ભીનું નહીં એવું હોવું જોઈએ.

લીટી બનાવવા માટે લોટને 10 એક સરખા ભાગમાં વહેંચી લેવો. હવે એક લુવા માંથી આંગળી અને અંગૂઠા વડે એક નાની વાટકી જેવું બનાવી એમાં વચ્ચે 1.5 ટેબલસ્પૂન જેટલું ફિલિંગ મૂકવું. કિનારીઓને વચ્ચે તરફ લાવતા જઈને ફીલિંગ ને બરાબર બંધ કરી દેવું અને ગોળો બનાવી લેવો. આ રીતે બધી લિટ્ટી તૈયાર કરી લેવી. ફીલિંગ બરાબર ઢંકાઈ જાય અને લિટ્ટી માં ક્યાંય પણ તિરાડ ના રહે એનું ધ્યાન રાખવું.

હવે એક જાડા તળિયાવાળી નોનસ્ટિક પેનમાં થોડું તેલ લગાવીને બધી લીટી ગોઠવી દેવી. લિટ્ટી ની ઉપર હલકો બ્રાઉન રંગ આવી જાય એ રીતે મીડીયમ તાપ પર થોડી શેકી લેવી. હવે બધી લીટી ને ઘઉં ચાળવાના ચારણા પર ગોઠવી દેવી અને એ ચારણાને રોટલી બનાવવાની લોઢી પર મૂકી દેવો. હવે ઢાંકીને મીડીયમ તાપ પર લિટ્ટી તૈયાર થાય ત્યાં સુધી શેકી લેવી. દર 10 મિનિટે લિટ્ટી ની સાઇડ બદલતા રહેવું. લિટ્ટી ને ઓવનમાં પણ બનાવી શકાય.

હવે તૈયાર થયેલી લિટ્ટી પર ઘી વાળો હાથ લગાડીને વાયર રેક પર સીધા તાપ પર જ શેકી લેવી જેથી કરીને છાણામાં શેકેલી લિટ્ટી જેવો દેખાવ આવે છે. હવે દરેક લીટી ને ઘીમાં બોળીને બાજુ પર રાખવી.

ચટણી બનાવવા માટે બધી વસ્તુઓને એક મિક્સર જારમાં ઉમેરીને વાટી લેવી.

લિટ્ટી ચોખા ને ચટણી અને કાંદા સાથે પીરસવું.