முதலில் வடை செய்வதற்கு கடலைப் பருப்பை கழுவி இரண்டு மணி நேரம் ஊற வைப்போம். கடலைப் பருப்பு ஊறியவுடன் தண்ணீரை வடித்துவிட்டு அதில் ஒரு பச்சை மிளகாய், அரை ஸ்பூன் சோம்பு, அரை ஸ்பூன் சீரகம், அரை ஸ்பூன் உப்பு சேர்த்து மிக்சியில் தண்ணீர் சேர்க்காமல் கரகரப்பாக அரைத்துக் கொள்வோம். பிறகு அதில் 2 டேபிள் ஸ்பூன் பொடியாக அரிந்த கொத்தமல்லித்தழை கொஞ்சம் கறிவேப்பிலை சேர்த்து பிசைந்து கொள்ளவும்..

ஒரு வாணலியில் வடை பொரிப்பதற்கு தேவையான எண்ணெய் ஊற்றி நன்கு சூடுபடுத்தவும். வடை மாவை சிறிய வடையாக தட்டி எண்ணெயில் பொரித்து எடுக்கவும். மிகவும் சிவக்க விட வேண்டாம்.

வடையை சிறு துண்டுகளாக உடைத்துக் கொள்ளவும். பிறகு ஒரு வாணலியில் 2 டேபிள்ஸ்பூன் எண்ணெய் விட்டு அதில் ஒரு பிரிஞ்சி இலை ஒரு பட்டை இரண்டு ஏலக்காய் மூன்று கிராம்பு மற்றும் அரை ஸ்பூன் சோம்பு சேர்த்து லேசாக சிவக்க விடவும்.

இவற்றுடன் பொடியாக அரிந்த வெங்காயத்தை நன்கு வதக்கவும். பிறகு இதில் இஞ்சி பூண்டு விழுதை சேர்த்து வதக்கவும். கொஞ்சம் கருவேப்பிலை சேர்த்து வதக்கவும். அதன்பின் இதில் கால் ஸ்பூன் மஞ்சள் தூள், அரை ஸ்பூன் மிளகாய்த்தூள், அரை ஸ்பூன் கொத்தமல்லி தூள், அரை ஸ்பூன் உப்பு சேர்த்து நன்கு மசாலா வாசம் வரும் வரை வதக்கவும். பிறகு பொடியாக அரிந்த ஒரு தக்காளியை சேர்த்து நன்கு மசியும் வரை வதக்கவும்.

தக்காளி நன்கு மசிந்த உடன் ஒரு கப் தண்ணீர் சேர்த்து உடன் ஒரு கப் தேங்காய் பாலை சேர்த்து மூடி வைத்து 2 நிமிடம் வரை வேக விடவும். 2 நிமிடம் கழித்து பியத்து வைத்த வடையை சேர்த்து 5 நிமிடம் வரை மூடி கொதிக்க விடவும்.

கடைசியில் பொடியாக அறிந்த மீதி கொத்தமல்லித் தழையை அதில் சேர்க்கவும். சுவையான ரெஸ்டாரன்ட் ஸ்டைல் வட கறி தயார். இதை இட்லி, தோசை மற்றும் சப்பாத்திக்கு பூரிக்கு தொட்டுக் கொண்டு சாப்பிடலாம்.