முதலில் இனிப்பு சேவை. வெறும் வாணலியில் வெள்ளை எள்ளை நன்றாக சிவக்க வறுத்துக்கொள்ளவும்.முக்கால் கப் வெல்லத்தை நன்றாக பொடியாக்கி ஒரு டம்ளர் தண்ணீர் சேர்த்து அதில் இரண்டு ஏலக்காயை நுனிக்கு போட்டு மெல்ல பாகாக காய்ச்சிக் கொள்ளவும். வெல்லம் நன்கு கரையும் வரை கொதித்தால் போதும். வறுத்த எள்ளு ஆறியவுடன் மிக்ஸியில் பொடியாக்கிக் கொள்ளவும். இப்போது காய்ச்சிய வெல்லப்பாகில் இந்த எள்ளு தூளை நன்கு கலந்து கொள்ளவும். சேவையில் சிறிது எடுத்து எள்ளு வெல்ல பாகை சேர்த்து சாப்பிடவும். மிகவும் சுவையாக இருக்கும்.

தக்காளி சேவை:இரண்டு மீடியம் சைஸ் தக்காளியை பொடியாக அரிந்து கொள்ளவும். ஒரு மீடியம் சைஸ் பெரிய வெங்காயத்தையும் பொடியாக அரிந்து கொள்ளவும். பச்சை மிளகாயை அரிந்து வைத்துக்கொள்ளவும். இப்போது வாணலியில் 2 ஸ்பூன் எண்ணெய் சேர்த்து, தலா அரை ஸ்பூன் கடுகு, உளுத்தம்பருப்பு,கடலைப்பருப்பு, 2 பொடியாக நறுக்கிய பச்சை மிளகாய், பொடியாக அரிந்த வெங்காயம், தக்காளி சிறிது கறிவேப்பிலை சேர்த்து நன்கு வதக்கிக் கொள்ளவும். தூள் உப்பு சேர்த்துக்கொள்ளவும்.

இப்போது தக்காளி சேவை செய்ய தேவையான சேவையை எடுத்து சிறிது தண்ணீர் தெளித்து பிசறிக் கொள்ளவும். இப்படி செய்வதால் வரவரப்பு இருக்காது. சேவையை தாளித்த பொருட்களுடன் சேர்த்து நன்கு சூடேறும் வரை கிளறிக் கொள்ளவும். சுவையான தக்காளி சேவை தயார்.

தேங்காய் சேவை: மீண்டும் ஒரு வாணலியில் ஒரு ஸ்பூன் எண்ணெய் சேர்த்து, காய்ந்த உடன் அரை ஸ்பூன் கடுகு, அரை ஸ்பூன் உளுத்தம் பருப்பு, அரை ஸ்பூன் கடலைப்பருப்பு, இரண்டு அரிந்த பச்சை மிளகாய், கொஞ்சம் கருவேப்பிலை சேர்த்து சிவந்தவுடன், துருவிய தேங்காயை சேர்த்து நன்கு வாசம் வரும் வரை வறுக்கவும்.மீண்டும் தேவையான சேவையை எடுத்து தண்ணீர் தெளித்து பிசறி விட்டு, வறுத்த தேங்காய் துருவலுடன் சேர்த்து நன்கு சூடு வரும் வரை வறுக்கவும். தேங்காய் சேவை தயார்.

இப்போது எள்ளு வெல்லப்பாகு இனிப்புசேவை மற்றும் தக்காளி, தேங்காய் சேவை தயார். என் அன்னைக்கு பிடித்த இடியாப்ப சேவைகள் இவைகள் எல்லாம். மேலும் நானும் ஒரு அன்னை. அதுவே என் மகனுக்கு பிடித்த மில்க்ஷேக் தயார் செய்தேன். இவைகள் அனைத்தும் எங்கள் வீட்டின் அன்னையர் தின ஸ்பெஷல் ரெசிப்பீஸ். (வீட்டிலே இடியாப்பம் நாமே செய்தும் கொள்ளலாம்)