நூறு கிராம் துவரம் பருப்பை இரண்டு டம்ளர் தண்ணீரில்,அரை ஸ்பூன் மஞ்சள் தூள் மற்றும் கால் ஸ்பூன் விளக்கெண்ணெய் சேர்த்து குக்கரில் 4 விசில் விட்டு வேக வைத்துக் கொள்ளவும். வாழைத்தண்டை அரிசி கழுவிய தண்ணீரில் கொஞ்சம் மோர் அல்லது தயிர் சேர்த்து சன்னமாக நார் இல்லாமல் அறிந்து கொள்ளவும். மோர் சேர்ப்பதால் வாழைத்தண்டு கருத்துப் போகாது.

வாணலியில் ஒரு ஸ்பூன் எண்ணெய் விட்டு 12 பல் பூண்டை வாசம் வரும் வரை லேசாக வறுத்துக் தனியாக எடுத்து வைத்துக் கொள்ளவும். வாழைத்தண்டை தண்ணீர் வடித்து விட்டு குக்கரில் அரை டம்ளர் தண்ணீர் மற்றும் உப்பு சேர்த்து வேகவைத்துக் கொள்ளவும். ஒரு விசில் விட்டால் போதும். இப்போது வெந்த பருப்பை பூண்டுடன், வேக வைத்த தண்டுடன் சேர்த்து பூண்டு வேகும் வரை வேக விடவும்

ஒரு வாணலியில் ஒரு ஸ்பூன் எண்ணெய் சேர்த்து, அதில் ஒரு ஸ்பூன் கடலைப்பருப்பு, அரை ஸ்பூன் உளுத்தம் பருப்பு, ஒரு ஸ்பூன் துவரம்பருப்பு, இரண்டு ஸ்பூன் கொத்தமல்லி, ஒரு ஸ்பூன் சீரகம், ஒரு ஸ்பூன் மிளகு, 6 வரமிளகாய்,3சிறிய வெங்காயம் சேர்த்து நன்கு சிவக்க வறுத்துக்கொள்ளவும். 1/2 கப் தேங்காய் துருவல் சேர்த்து எல்லாவற்றையும் மிக்ஸியில் நைசாக அரைத்துக் கொள்ளவும்.

அரைத்த விழுதை, தண்டு பருப்பு கலவையில் சேர்த்து தேவை என்றால் கொஞ்சமாக தண்ணீர் சேர்த்து கொதிக்கவிடவும். கால் கப் பால் இப்போது சேர்க்கவும்.கடுகு, உளுத்தம்பருப்பு, பெருங்காயத்தூள், கிள்ளிய வரமிளகாய், கருவேப்பிலை தாளித்து குழம்பில் சேர்க்கவும். கொத்தமல்லி தழை கடைசியாக சேர்க்கவும்.

இப்போது தண்டு பரமேணியம் தயார். சாப்பாட்டிற்கு சுவையாக இருக்கும்.இட்லி, தோசை மற்றும் சப்பாத்தியுடன் தொட்டுக்கொண்டு சாப்பிடலாம்.