முட்டை கோஸை பொடியாக அரிந்து கொள்ளவும். ஒரு பெரிய வெங்காயத்தை பொடியாக அரிந்து கொள்ளவும். இதர தேவையான பொருட்களை தயாராக எடுத்து வைத்துக் கொள்ள வேண்டும்.

ஒரு நான் ஸ்டிக் கடாயில் ஒரு டேபிள்ஸ்பூன் எண்ணெய் சேர்த்து அதில் ஒரு ஸ்பூன் கடுகு, அரை ஸ்பூன் சீரகம்,ஒரு ஸ்பூன் உளுத்தம் பருப்பு, ஒரு ஸ்பூன் கடலைப்பருப்பு, கிள்ளிய இரண்டு வர மிளகாய் சேர்த்து சிவக்க வதக்கவும். பிறகு அதில் பொடியாக அரிந்த வெங்காயத்தை சேர்த்து வதக்கிக் கொள்ளவும். பாதிக்கு மேல் வதங்கிய உடன் பொடியாக அரிந்த முட்டைகோஸ் சேர்க்கவும். அதில் தேவையான அளவு தூள் உப்பு மற்றும் மஞ்சள் தூள் சேர்த்து எல்லாவற்றையும் நன்றாக கலந்து விடவும். 5 நிமிடம் வரை மூடிவைத்து ஆவியில் வேகவிடவும்.

ஒரு மிக்ஸி ஜாரில் அரைக் கப் தேங்காய் துருவல், 6 பச்சை மிளகாய், 5 அல்லது 6 பல் பூண்டு சேர்த்து தண்ணீர் சேர்க்காமல் கரகரப்பாக அரைத்துக் கொள்ளவும். ஐந்து நிமிடம் முட்டைகோஸ் வெந்தவுடன் தேங்காய் விழுதை முட்டைக்கோஸில் சேர்த்து நன்கு கலந்து விடவும். மீண்டும் 5 நிமிடம் மூடி வைத்து வேக விடவும். நான் ஸ்டிக் தவா என்பதால் தண்ணீர் தெளிக்க தேவையில்லை.சாதாரண வாணலி என்றால் லேசாக தண்ணீர் தெளித்துக் கொள்ளவும்.

நன்றாக கலந்த பின் பொடியாக அரிந்த கொத்தமல்லித் தழையை தூவி இறக்கவும். சூப்பரான ஆந்திரா ஸ்பெஷல் முட்டைக்கோஸ் பொரியல் தயார். காரம் அவரவர் தேவைக்கு ஏற்ப மிளகாய் சேர்த்துக் கொள்ளவும்.சாதத்தில் பிசைந்து சாப்பிடவும், ரசம், மோர் சாதத்திற்கு தொட்டுக் கொண்டு சாப்பிடவும், சப்பாத்திக்கு தொட்டு சாப்பிட சுவையாக இருக்கும்.