கடையில் நைலான் ஜவ்வரிசி என்று கேட்டு வாங்கவும். இங்கு சேலத்தில் வரலட்சுமி ஜவ்வரிசி நன்றாக இருக்கும். உங்கள் ஊரில் இந்த பிராண்ட் கிடைத்தால் வாங்கி கொள்ளவும். ஜவ்வரிசியை நன்கு கழுவிக் கொள்ளவும். பிறகு அதில் கடைந்த அரை டம்ளர் புளித்த மோர் சேர்த்து ஊறவைக்கவும். ஜவ்வரிசி லேசாக மிதக்க ஊறவைத்தால் போதும். ஆறு மணி நேரத்திலிருந்து 8 மணி நேரம் வரை ஊற வைக்கவும். இதற்கிடையில் பச்சைமிளகாய் பொடியாக அரிந்து கொள்ளவும். மற்ற தேவையான பொருட்களை எடுத்து வைத்துக் கொள்ளவும்

பாசிப்பருப்பை கழுவி தண்ணீர் சேர்த்து வேகவிடவும். நெத்து பதமாக வேக விடவும்.(படத்தில் காட்டியுள்ளபடி) குழைய விடக்கூடாது.

கறிவேப்பிலை கொத்தமல்லி பச்சை மிளகாயை பொடியாக அரிந்து கொள்ளவும். ஊற வைத்த ஜவ்வரிசியை எடுத்துக் கொள்ளவும்.ஒரு அடி கனமான வாணலியில் எண்ணெய் சேர்த்து கடுகு உளுத்தம்பருப்பு கடலைப்பருப்பு சேர்த்து சிவக்க விடவும்.கடுகை பொரிய விடவும்.

பிறகு அதில் கறிவேப்பிலை கொத்தமல்லி பச்சை மிளகாய் சேர்த்து வதக்கி கொள்ளவும். வதக்கிய பிறகு ஊற வைத்த ஜவ்வரிசியை சேர்த்து கொள்ளவும். மஞ்சள் தூள் சிறிது சேர்த்து கொள்ளவும். மிதமான தீயில் கைவிடாமல் கிளறிக் கொண்டே இருக்கவும். அரிசி லேசாக உப்பி கண்ணாடி போல் வரும்போது தூள் உப்பு தேவையான அளவு சேர்க்கவும். பிறகு வேக வைத்த பாசிப்பருப்பு மற்றும் தேங்காயை சேர்க்கவும்.. மீண்டும் நன்கு சூடு ஏற கிளறி விடவும்.அடிப்பிடிக்காமல் ஜவ்வரிசி ஒன்றோடு ஒன்று ஒட்டிக் கொள்ளாமல் கிளறி விடவும.

அரை டம்ளர் மோர் ஒரு டம்ளர் ஜவ்வரிசிக் போதுமானது. நிறைய மோர் சேர்த்தால் கிளறும் போது எல்லாம் ஒன்றோடு ஒன்று ஒட்டிக் கொள்ளும்.அதேபோல் தூள் உப்பு கடைசியாக தான் சேர்க்க வேண்டும். ஊறவைக்கும் போது உப்பு சேர்க்க வேண்டாம். அதேபோல் பாசிப்பயறும் குழைய வேக விடக்கூடாது. சுவையான ஜவ்வரிசி உப்புமா ரெடி.