ஒரு பெரிய வெங்காயத்தை நீளவாக்கில் சன்னமாக அரிந்து கொள்ளவும். வெங்காயத்தாள் ஒரு கப் வரும் அளவிற்கு படத்தில் காட்டியுள்ளபடி அரிந்து கொள்ளவும்.ஒரு ஸ்பூன் இஞ்சி பொடியாக அரிந்து கொள்ளவும் நான்கு பச்சை மிளகாய் நீளவாக்கில் அரிந்து கொள்ளவும். ஒரு கப் ரவை எடுத்துக் கொள்ளவும்.ஒரு வாணலியில் எண்ணெய் சேர்த்து அதில் கடுகு, உளுத்தம்பருப்பு, ஒரு வர மிளகாய், கடலைப்பருப்பு சேர்த்து தாளித்துக் கொள்ளவும். சிவந்தவுடன் வெங்காயம் பிறகு பச்சை மிளகாய், கருவேப்பிலை சேர்த்துக் கொள்ளவும்.

வெங்காயம் பச்சை மிளகாய், லேசாக வதங்கியவுடன், அரிந்து வைத்த வெங்காயத்தாள் சேர்த்து நிறம் மாறாமல் வதக்கவும்.பிறகு 1 டம்ளர் ரவைக்கு 3டம்ளர் தண்ணீர் சேர்த்து கொள்ளவும். இதில் நறுக்கிய கொத்தமல்லி, தேவையான அளவு உப்பு, 1/4 ஸ்பூன் மஞ்சள் தூள்,1 ஸ்பூன் சர்க்கரை சேர்த்துக் கொள்ளவும். ரவையை வறுக்கத் தேவையில்லை.தண்ணீர் கொதித்து வெங்காயம், வெங்காயத்தாள் வெந்தவுடன் ரவையை கொட்டி கட்டி இல்லாமல் நன்கு கிளறி விடவும். நீண்ட நேரம் வேக விட வேண்டியது இல்லை. தேவையென்றால் மீண்டும் சிறிது எண்ணெய் சேர்த்து கொள்ளவும்.

ஒரு ஸ்பூன் நெய் சேர்த்துக் கொள்ளவும். தொட்டுப் பார்த்தால் கையில் ரவை ஒட்டக் கூடாது. இந்தத் தருணத்தில் அடுப்பை நிறுத்தி விடவும்.மீண்டும் ஒரு முறை உப்புமாவை நன்கு கிளறி விட்டு மூடி வைக்கவும். 5 நிமிடம் கழித்து உப்புமாவை ஹாட் பாக்ஸில் மாற்றிக் கொள்ளவும்.