સૌપ્રથમ એક બાઉલમાં મેંદો અને ઘઉંનો લોટ લઇ તેમાં તેલ અને મીઠું ઉમેરી બરાબર મિક્સ કરી લેવું.ત્યારબાદ થોડું થોડું પાણી ઉમેરી રોટલી કરે તેવો લોટ બાંધી લેવો.ત્યારબાદ તેને ૧૦-૧૫ મિનિટ ઢાંકીને સાઇડમાં મૂકી દેવો.ત્યારસુધી એક તપેલીમાં પાણી લઈ તેમાં એક ચમચી તેલ અને એક નાની ચમચી મીઠું નાખી નુડલ્સ ઉમેરી તેને બાફવા મૂકી દેવું.નુડલ્સ હાથેથી ટૂટે તેવા થાય ત્યા સુધી જ બફાવવા દેવા.

નુડલ્સ બફાય ગયા બાદ તેને ચાળણામાં કાઢી તેના ઉપર ઠંડુ પાણી રેડી અને એક ચમચી તેલ નાખી લેવું.ત્યારબાદ રોટલી માટે જે લોટ બાંધ્યો છે તેની એકસરખા માપની બે રોટલી વણી તેમાંથી એક રોટલી લઇ તેના ઉપર ચારેબાજુ તેલ લગાવી ઉપર મેંદો છાંટવો.ત્યારબાદ તેની ઉપર બીજી વણેલી રોટલી મૂકી તેને હલકા હાથેથી વણી લેવી.

ત્યારબાદ તેને કાચીપાકી સેકી લેવી.નોર્મલ ઠંડી થયા બાદ તેના પડ અલગ કરવા.અને તેની પટ્ટી કાપવી.ત્યારબાદ એક પેન લઈ તેમાં તેલ મૂકી તેમાં ડુંગળી,કોબીઝ,કેપ્સીકમ અને ગાજર ઉમેરી તેને સાંતળવું.૫-૬ મિનિટ સંતળાય ગયા બાદ તેમાં આદુ-લસણ-મરચાંની પેસ્ટ,લાલ મરચું પાઉડર,મીઠું અને મરી પાઉડર નાંખી બરાબર હલાવી લેવું.

ત્યારબાદ ૨ મિનિટ સુધી હલાવતા રહો પછી તેમાં નુડલ્સ ઉમેરી તેને બરાબર મિક્સ કરી લેવું. નુડલ્સ મિક્સ થયા બાદ તેમાં રેડ ચીલી સોસ,સોયા સોસ,ટોમેટો કેચઅપ અને વિનેગર ઉમેરી તેને બરાબર મિક્સ કરી લઇ તેને ૨-૩ મિનિટ થવા દેવું.આ રીતે સમોસા માટેનું સ્ટફીંગ તૈયાર કરવું.

ત્યારબાદ એક વાટકીમાં ૨ ચમચી ઘઉંનો લોટ લઇ તેમાં પાણી ઉમેરી એક જાડી પેસ્ટ તૈયાર કરવી.હવે પટ્ટી લઈ તેને પેસ્ટની મદદથી ચોંટાડી સમોસા વાળતા જઇ તેમાં સ્ટફીંગ ભરી સમોસા બનાવી લેવા.બધા સમોસા આ રીતે તૈયાર કરી લેવા.ત્યારબાદ તેને તળી લેવા.તો તૈયાર છે ગરમાગરમ ચાઇનીઝ સમોસા.