ஒரு கிண்ணத்தில், கொடுக்கப்பட்ட அளவுகளில் கடலை மாவு அரிசி மாவு மற்றும் மஞ்சள் தூள் சேர்க்கவும்.

இதனோடு மிளகாய்த்தூள், பெருங்காயத்தூள்,இட்லி சோடா மற்றும் உப்பு சேர்த்து கலக்கி விடவும்.

இந்த கலவையை சிறிது சிறிதாக தண்ணீர் சேர்த்து கெட்டியாக பிசைந்து கொள்ளவும். இதனை மூடி வைக்கவும்

சிறு பல் கொண்ட பூண்டை தோலுடன் தட்டி எண்ணெயில் சிவக்க பொரித்து எடுக்கவும். இதனை ஒரு வடி பாத்திரத்தில் போட்டு வைக்கவும். கருவேப்பிலையை நன்கு கழுவி துணியால் துடைத்து எண்ணெயில் பொரித்தெடுக்கவும்.

அதன்பின் வேர்க்கடலை, பொட்டுக்கடலை மற்றும் பாதம் இவற்றை சிவக்க பொரித்து, எண்ணையை வடித்து வடி பாத்திரத்தில் சேர்த்துக் கொள்ளவும்.

அதன்பின் கார்ன் ஃப்ளேக்ஸ் மற்றும் அவல் இவற்றை பொரித்து எடுக்கவும்.

கடையில் மிக்சர் அவல் என்று கேட்டு வாங்கவும். முறுக்குக் குழாயில் ஓமப்பொடி அச்சில் போட்டு மாவை எண்ணை தொட்டு குழாயில் வைத்து மூடவும்.

சூடான எண்ணெயில் ஓமப்பொடி பொரித்து எடுக்கவும். முக்கால் பங்கு மாவில் ஓமப்பொடி போட்டுக் கொள்ளவும். இறுதியில் முறுக்கு குழாயில் ஒட்டியிருக்கும் மாவை எடுத்து கிண்ணத்தில் உள்ள கால்பங்கு மாவுடன் சேர்த்துக் கொள்ளவும்.

இதனை தண்ணீர் விட்டு தோசை மாவு பதத்திற்கு கரைத்துக் கொள்ளவும்.இப்பொழுது பூந்தி கரண்டியில் மாவை ஊற்றி சூடான எண்ணையில் படத்தில் காட்டியுள்ளபடி பூந்தி போட்டுக் கொள்ளவும். பூந்தி கரண்டியின் மீது 2 குழிக்கரண்டி மாவை சேர்த்து தேய்த்து விட்டால், காராபூந்தி முத்துமுத்தாக எண்ணெயில் விழும்.

காராபூந்தி மொறுமொறுவென்று பொரித்து எடுக்கவும்.இரண்டாம் முறை பூந்தி போடுவதற்கு முன் கரண்டியின் பின்பக்கம் கைகளால் சுத்தமாக துடைத்து எடுக்கவும். அதன்பின் பூந்தி போட்டால் மாவின் இறுதி வரைக்கும் பூந்தி முத்து முத்தாக விழும். (ஒவ்வொரு முறை பூந்தி போடும்போதும் கரண்டியின் பின்பக்கம் துடைத்து எடுக்கவும்)

பொரித்து எடுத்து அனைத்தையும் எடுத்து வைக்கவும். ஒரு பெரிய பாத்திரத்தில் பொரித்த ஓமப் பொடியை சேர்த்து உடைத்து விடவும். இதனோடு பொரித்து பூந்தியை சேர்க்கவும்.

ஒன்றன் பின் ஒன்றாக பொரித்து வைத்துள்ள அனைத்தையும் சேர்த்து மிளகாய் தூள் சேர்க்கவும்.

இதனோடு உப்பு சேர்த்து நன்கு கலந்து விடவும். கொடுக்கப்பட்டுள்ள அளவுகளில் 750 கிராம் மிக்சர் கிடைக்கும்.