સૌપ્રથમ દ્રાક્ષને ધોઈને એકદમ બારીક ચોપ કરવી જેના માટે ચોપર નો ઉપયોગ કરી શકાય અથવા તો મિક્સરમાં અધકચરી વાટી લેવી. હવે દ્રાક્ષ અને ખાંડ ને એક પોટ માં ઉમેરીને મીડીયમ તાપે પકવવું. લીંબુનાં ફૂલને 1 ટીસ્પૂન પાણીમાં ઓગાળીને દ્રાક્ષમાં ઉમેરવા.

દ્રાક્ષના મિશ્રણને જ્યાં સુધી લગભગ બધું પાણી ઉડી જાય ત્યાં સુધી પકવતા રહેવું, ત્યારબાદ તેને એકદમ ઠંડુ થવા દેવું. કાળી દ્રાક્ષના પલ્પને પહેલેથી બનાવી રાખી ને ફ્રિજમાં રાખી શકાય.

બેઝિક આઈસ્ક્રીમ મિક્સ બનાવવા માટે વ્હિપિંગ ક્રીમ ને એક મોટા વાસણમાં ઉમેરીને ઈલેક્ટ્રીક બીટર ની મદદથી જ્યાં સુધી એમાં સોફ્ટ પીક આવી જાય ત્યાં સુધી બીટ કરવું. હવે તેમાં ઠંડું દૂધ અને કન્ડેન્સ્ડ મિલ્ક ઉમેરીને વ્હિસ્ક ની મદદથી બધું હલાવી લેવું, બીટર નો ઉપયોગ કરવો નહીં. આ વાસણને ઢાંકીને ફ્રીઝરમાં ૩ થી ૪ કલાક માટે રહેવા દેવું.

૩ થી ૪ કલાક પછી બેઝિક આઈસ્ક્રીમ મિક્સ ને ફ્રીઝર ની બહાર લઈ ને ફરીથી એકવાર વ્હિસ્ક ની મદદથી સરખું હલાવી લેવું અને ત્યારબાદ તેમાં તૈયાર કરેલો કાળી દ્રાક્ષનો એક કપ પલ્પ (1 ટેબલ સ્પૂન બાજુ પર રાખવી જે આઇસક્રીમની ઉપર ઉમેરવામાં કામ લાગશે) ઉમેરી બધું સરસ રીતે હલાવી લેવું જેથી કરીને પલ્પ આઈસ્ક્રીમ મિક્સ માં સારી રીતે મિક્સ થઈ જાય.

હવે આઇસ્ક્રીમ મિક્સ ને એક લીટર ના ટબમાં 1/2 સુધી ભરવું ત્યારબાદ તેના પર 1/2ટેબલ સ્પૂન પલ્પ ઉમેરીને ફેલાવી દેવો અને બાકીનું આઈસ્ક્રીમ મિક્સ એના પર ઉમેરી ટબ ભરી લેવું. વધેલો પલ્પ ઉપર ઉમેરીને ફેલાવી દેવો ત્યારબાદ ઢાંકણ બંધ કરીને ફ્રીઝર માં 8 - 10 કલાક અથવા એકદમ સેટ થઈ જાય ત્યાં સુધી રહેવા દેવું.

રિફ્રેશિંગ બ્લેક કરન્ટ આઈસ્ક્રીમ સર્વ કરવા માટે તૈયાર છે.