સૌ પ્રથમ ભીંડાને પાણીથી ધોઈને કોટન કપડા વડે લૂછીને કોરા કરી લો. માર્કેટમાંથી ભીંડા લાવો ત્યારે વીણીને કૂણા ભીંડા હોય તેવા લેવા, જો પાકટ મોટા બી વાળા ભીંડા હોય તો તેનું શાક ખાવાની મજા નથી આવતી. ત્યારબાદ ભીંડાના આગળનાં ડીંટા તથા પાછળનો અણીદાર ભાગ કાપી લેવો. ભીંડાનાં આગળનાં ભાગમાં બે ઉભા કાપા કરો. જો ભીંડા મોટી સાઈઝનાં હોય તો કાપીને બે ભાગ કરી પછી કાપા કરવા.

એક ફ્રાયપેનમાં તેલ ગરમ કરવા મૂકો, તેલ સરખું ગરમ થાય પછી તેમાં વઘાર માટે જીરું તથા હીંગ ઉમેરી જીરું તતડે પછી તેમાં તૈયાર કરેલા ભીંડા ઉમેરો. તેમાં ઉપરથી હળદર, લાલ મરચું, ધાણાજીરું તથા મીઠું ઉમેરી મિક્સ કરો. આ શાકમાં મીઠું પ્રમાણસર ઉમેરવું કારણકે ભીંડા શોષવાઈ જાય તો વધારે મીઠું હોય તો શાક ખારૂ થઈ જાય, ૫૦૦ ગ્રામ ભીંડા હોય તો ૧ ચમચી મીઠું ઉમેરવું. ધીમા તાપે ઢાંકણ ઢાંકીને ૧૫ મિનિટ શાકને પકાવો.

તેલ છૂટશે અને બધો મસાલો એકરસ થઈને ભીંડામાં ભળી જશે એટલે શાક તૈયાર થઈ જશે. ગેસ બંધ કરીને તૈયાર શાકને ગરમાગરમ રોટલી સાથે સર્વ કરો. તો તૈયાર છે ભરેલા ભીંડાનું શાક.