સૌ પ્રથમ કાબુલી ચણા ને 7-8 કલાક પલાળી રાખવા.ત્યારબાદ પોટલી ના ઘટકો લઇ પોટલી તૈયાર કરવી. હવે ચણા ને કુકર માં લઇ તેમાં પોટલી,પાણી અને સંચળ નાખીને કુકર ની 5-6 સિટી વગાડી લેવી.ચણા ઠંડા થાય એટલે પાણી અલગ કાઢી લેવું.

કુલચા માટે એક કથરોટ માં મેંદો ચાળી લેવો.તેમાં બધા ઘટકો ઉમેરી ને મિક્સ કરવું.જરૂર મુજબ પાણી ઉમેરી ડો તૈયાર કરવો.લોટ ને હથેળી થી સરખો મસળી પછી નીચે તરફ ગોળ વાળી લેવો.તેના પર તેલ લગાવી ભીના કપડા થી ઢાંકી ને 25 મિનિટ રાખી દેવો.

હવે છોલે માટે તૈયારી કરશું.પહેલા એક પ્લેટ માં જણાવ્યા પ્રમાણે મસાલા લઇ મિક્સ કરી લેવા.

કડાઈ માં તેલ ગરમ કરી જીરું ક્રેક થાય એટલે તમાલ પત્ર અને કસૂરી મેથી ઉમેરવી.હવે તેમાં ડુંગળી સાંતળી લેવી.પછી આદુ લસણ ની પેસ્ટ અને મસાલા મિક્સ ઉમેરવા.બધું મિક્સ કરી 2 મિનિટ કુક થવા દેવું.

હવે ટામેટા ની પ્યુરી અને મીઠું ઉમેરો. થોડી વાર માં તેલ છુટે એટલે ચણા ઉમેરી દો.તેમાંથી 2 ચમચી ચણા ને મેશ કરી ને ઉમેરવા.હવે ચણા નું પાણી ઉમેરી 5 મિનિટ ઢાંકી ને ચડવા દેવું.પછી કોથમીર ઉમેરી ઉતારી લેવું.

હવે ફૂલચા ના લોટ માંથી મોટો લુવા પાડી લેવા. પાટલા ઉપર તેલ લગાડી લુવા ને થોડું થેપિ તેના પર કાળા તલ અને કોથમીર ઉમેરી ઓવલ શેપ માં વણી લેવા.કુલચા થોડા જાડા વણવા.

કુલચા ની પ્લેન સાઈડ માં પાણી લગાવી નોનસ્ટિક તવી માં પાણી વાળો ભાગ નીચે આવે એ રીતે રાખો.હવે કિનારી પર 1 ચમચી પાણી છાંટી તરત ઢાંકણ ઢાંકી ને ધીમી આંચ પર શેકવું.જેથી સરસ ફૂલશે આ રીતે બંને સાઈડ શેકાઈ જાય એટલે ઘી કે બટર લગાવી દેવું.

તો તૈયાર છે છોલે કુલચા. તેને ગરમ ગરમ સર્વ કરવા.