முதலில் அரை வாழைக்காயை ஒரு பாத்திரத்தில் தண்ணீர் சேர்த்து 10 நிமிடம் வேக வைத்துக் கொள்ளவும். வாழைக்காய் தோல் கருப்பாக மாறும் வரை வேக விடவும். பிறகு ஆற விட்டு தோலை உரித்துக் கொள்ளவும். கேரட் துருவியில் வாழைக்காயை சன்னமாக துருவிக் கொள்ளவும்

துருவிய வாழைக்காய் தனியாக எடுத்து வைத்துக் கொள்ளவும். இப்போது 5 சின்ன வெங்காயம் பொடியாக அரிந்து கொள்ளவும். 3 பச்சை மிளகாயை பொடியாக அரிந்து கொள்ளவும். 2 டீஸ்பூன் தேங்காய்த் துருவல் எடுத்து வைத்துக் கொள்ளவும்.

ஒரு பெரிய வாணலியில் 2 ஸ்பூன் எண்ணெய் சேர்த்து காய்ந்தவுடன் அதில் கடுகு, உளுத்தம்பருப்பு, கடலைப்பருப்பு பெருங்காயத்தூள் சேர்த்து சிவக்க விடவும். பிறகு அதில் பொடியாக அரிந்த வெங்காயம், பச்சை மிளகாய், கறிவேப்பிலை சேர்த்து சிவக்க வதக்கவும். வதங்கிய பின் துருவிய வாழைக்காயை உப்பு சேர்த்து வதக்கிக் கொள்ளவும். கடைசியாக தேங்காய் துருவல் சேர்த்து பிரட்டிக் கொள்ளவும். கொத்துமல்லித்தழை தூவி அலங்கரிக்கவும்.

சுவையான வாழைக்காய் பொடிமாஸ் தயார். சாதத்துடன் தொட்டு சாப்பிடவும், சாதத்தில் கலந்து சாப்பிடவும் சுவையாக இருக்கும்.