பாகற்காயை கழுவி உள்ளிருக்கும் வெள்ளை பகுதியை ஒரு ஸ்பூனால் சுரண்டி எடுக்கவும். பொடியாக அரிந்து வைக்கவும். சின்ன வெங்காயம் 10 பொடியாக அரிந்து வைக்கவும் பூண்டு ஆறு பல் பொடியாக அரிந்து வைக்கவும் புளி இரண்டு டம்ளர் தண்ணீர் விட்டுக் கரைத்து வடிகட்டி வைக்கவும்.

ஒரு கடாயை சூடாக்கி அதில் நான்கு ஸ்பூன் உளுத்தம் பருப்பை போட்டு சிம்மில் வைத்து பொன்னிறமாக வறுக்கவும். மிக்ஸி ஜாரில் அதை பவுடராக அரைத்து வைக்கவும். வாணலியில் ஒரு குழிக்கரண்டி எண்ணெய் விட்டு சூடானதும் கடுகு உளுந்து ஒரு வரமிளகாய் தாளித்து கருவேப்பிலை வெங்காயம் பூண்டு போட்டு வதக்கவும். வதக்கியதும் பொடியாக அரிந்த பாவற்காய் சேர்த்து 3 நிமிடம் வதக்கவும். புளியை கரைத்து பாகற்காய் மூழ்கும் அளவுக்கு ஊற்றவும். சாம்பார் பொடி ஒரு ஸ்பூன் மஞ்சள் தூள் தேவையான உப்பு சேர்த்து கலந்து விடவும்.

அடுப்பை சிம்மில் வைத்து பாகற்காயை வேகவிடவும். பாகற்காய் வெந்ததும் அரைத்து வைத்த உளுந்து பொடி நாட்டுச்சக்கரை 3 ஸ்பூன் சேர்த்து கலந்து விடவும். அடிப்பிடிக்காமல் சுருள வதக்கி கெட்டியானதும் இறக்கவும்..சுவையான பாகற்காய் உளுந்து பொடி பொரியல் தயார். மிகவும் சுவையாக இருக்கும் செய்து பாருங்கள்.