அரை கப் மணத்தக்காளி வற்றல் எடுத்து வைத்துக் கொள்ளவும். இரண்டு மீடியம் சைஸ் பெரிய வெங்காயத்தை பொடியாக அரிந்து கொள்ளவும். 1 மீடியம் சைஸ் தக்காளி பொடியாக அரிந்து கொள்ளவும். ஒரு எலுமிச்சை அளவு புளியை தண்ணீரில் ஊற வைத்து கரைத்து வைத்துக் கொள்ளவும்.

அரை கப் தேங்காய் துருவி வைத்துக் கொள்ளவும். 3 வரமிளகாய், அரை ஸ்பூன் உளுத்தம் பருப்பு, ஒரு ஸ்பூன் கடலை பருப்பு, 1,1/2 ஸ்பூன் கொத்தமல்லி, அரை ஸ்பூன் சீரகம் அரை ஸ்பூன் வெந்தயம் கால் ஸ்பூன் மிளகு1/4 ஸ்பூன் அரிசி இவற்றை ஒரு ஸ்பூன் எண்ணெயில் சிவக்க வறுத்துக் கொள்ளவும். இத்துடன் நாலு பல் பூண்டு, ஒரு துண்டு இஞ்சி சேர்த்து வதக்கிக் கொள்ளவும்.அத்துடன் துருவிய தேங்காயை சேர்த்து வறுத்துக் கொள்ளவும். இவை ஆறியவுடன் மிக்ஸியில் தண்ணீர் கொஞ்சமாக நீர் சேர்த்து நைஸாக அரைத்து வைத்துக் கொள்ளவும்.

மணத்தக்காளி வற்றலை எண்ணெய் சேர்த்து வறுத்து எடுத்து தனியாக வைத்துக் கொள்ளவும். இப்போது ஒரு குழி கரண்டி அளவு நல்லெண்ணெயை வாணலியில் ஊற்றி, அது காய்ந்தவுடன் கடுகு உளுத்தம்பருப்பு பெருங்காயத்தூள் மற்றும் வர மிளகாய் கருவேப்பிலை தாளித்து அதனுடன் வெங்காயம் தக்காளி சேர்த்து நன்கு வதக்கிக் கொள்ளவும். இவை வதங்கிய உடன் அரை ஸ்பூன் மஞ்சள் தூள்,மூன்று ஸ்பூன் சாம்பார் தூள், தேவையான அளவு உப்பு சேர்த்து வதக்கிக் கொள்ளவும் பிறகு கரைத்த புளித்தண்ணீரை சேர்த்து வெங்காயம் தக்காளியை வேக விடவும்.

வறுத்து வைத்த மணத்தக்காளி வற்றலை சேர்த்துக்கொள்ளவும். இதை ஒரு கொதி கொதித்தவுடன் அரைத்த தேங்காய் விழுதை சேர்த்துக் கொதிக்கவிடவும்.தங்களுக்கு விருப்பமான அளவு சர்க்கரை அல்லது வெல்லம் சேர்த்துக் கொள்ளவும். மணத்தக்காளி வற்றல் குழம்பு தயார்.