ஒரு கற்றை வெந்தயக்கீரையை ஆய்ந்து அலசி வைத்துக்கொள்ளவும்.ஒரு கப் பாசிப்பருப்பு மற்றும் ஒரு டேபிள்ஸ்பூன் கடலைப்பருப்பு இரண்டையும் வெறும் வாணலியில் லேசாக சூடு வர வறுத்து கொள்ளவும். பிறகு பருப்பை கழுவி தண்ணீர் சேர்த்து நன்கு வேகவைத்துக் கொள்ளவும். ரெண்டு டேபிள்ஸ்பூன் துருவிய தேங்காய் எடுத்து வைத்துக் கொள்ளவும்.நான் வெங்காயம் பூண்டு எதுவும் சேர்க்கவில்லை தங்களுக்கு விருப்பம் என்றால் சேர்த்துக்கொள்ளலாம்.

ஒரு வாணலியில் ஒரு ஸ்பூன் எண்ணெய் சேர்த்து அதில் சீரகம், கடுகு, உளுத்தம்பருப்பு, கடலைப்பருப்பு, இரண்டு வரமிளகாய் கில்லியது சேர்த்து தாளித்துக் கொள்ளவும். பிறகு அலசி வைத்த வெந்தயக்கீரையை அதில் சேர்த்து லேசாக வதக்கவும். பிறகு வேக வைத்த பாசிப்பருப்பு கடலைப் பருப்பு கலவையை அதில் சேர்த்து லேசாக தண்ணீர் சேர்த்து வேகவிடவும். கீரை வெந்து கெட்டியான உடன் அதில் துருவிய தேங்காயை சேர்த்து கொள்ளவும்.லேசாக வெந்தயக்கீரை கசக்கும் என்பதால் தங்களுக்கு தேவை என்றால் ஒரு ஸ்பூன் சர்க்கரை சேர்த்துக் கொள்ளவும்.