வாழை இலை மீன் மசாலா (Karimeen pollichathu recipe in tamil)

மீனை கழுவி சுத்தம் செய்து கீறல் போட்டுக் கொள்ளவும். மஞ்சள்தூள், மிளகாய்த்தூள், உப்பு கலந்து கொள்ளவும். இதனை மீன் துண்டுகளின் மேல் தடவி 15 நிமிடம் ஊற வைக்கவும்.

அகன்ற கடாயில் எண்ணெய் சூடானதும் மீன் துண்டுகளை இரண்டு பக்கம் திருப்பி போட்டு பொரிக்கவும். பொரித்த துண்டுகளை ஒரு தட்டில் வைத்துக் கொள்ளவும்.

அதே கடாயில் தேவையான அளவு எண்ணெய் வைத்துக் கொண்டு இதில் நறுக்கிய சின்ன வெங்காயம் சேர்த்து வதக்கி கொள்ளவும். வதங்கியதும் இஞ்சி பூண்டு விழுது சேர்க்கவும்.பச்சை வாடை போன பின், பச்சை மிளகாய், கருவேப்பிலை சேர்த்துக்கொண்டு, தக்காளியையும் சேர்த்து, தக்காளி மசியும்வரை வதக்கவும்.

இதில் மேலே குறிப்பிட்டுள்ள பொடிகள் அனைத்தையும் சேர்த்து வதக்கவும்.கூடவே தேங்காய் பால் மற்றும் எலுமிச்சை சாறு சேர்த்து கலந்து விடவும்.வதங்கியதும் கொத்தமல்லி இலைகளை சேர்த்து மசாலாவை தனியாக ஒரு பாத்திரத்தில் எடுத்துக் கொள்ளவும்.

மீன் துண்டுகளின் எண்ணிக்கையில் வாழை இலைகளை சதுரமாக வெட்டி கழுவி துடைத்து கொள்ளவும். இந்த இலைகளை அடுப்பின் சூட்டில் வாட்டிக் கொள்ளவும். இந்த வாழை இலையின் மீது தயார் செய்த வெங்காய தக்காளி மசாலாவை சிறிது வைத்து பரப்பவும்.

அதற்குமேல் ஒரு மீனை வைக்கவும். அதன் மேல் மீண்டும் மசாலாவை வைக்கவும். நான்கு புறமும் இதனை மடித்துக் கொள்ளவும்.

வாழை நார் அல்லது பூக்கட்டும் நூலைக் கொண்டு வாழை இலையில் உள்ள மீனை கட்டிக்கொள்ளவும். இவ்வாறு அனைத்தையும் தயார் செய்து வைக்கவும். மீண்டும் அதே கடாயில் தயார் செய்த மீன்களை வைக்கவும். அடுப்பை ஆன் செய்து, இரண்டு மேசைக் கரண்டி தேங்காய் எண்ணெய் சேர்க்கவும். இதனை 3 நிமிடங்கள் வேகவிடவும். பிறகு இன்னொரு பக்கம் திருப்பி போடவும். இதனை மூடி போட்டு மேலும் 2 நிமிடங்கள் வேகவிடவும்.

அடுப்பை அனைத்து வாழையிலை மீனை சுடசுட சாதத்துடன் பரிமாறவும்.குணங்கள் அதிகம் நிறைந்த வாழை இலையோடு மீன் சேர்த்து சமைக்கும் பொழுது ஆரோக்கியம் கூடும்.