கோவைக்காயை அரிசி கழுவிய தண்ணீரில் சிறிது நேரம் போட்டு வைத்து பிறகு நன்கு கழுவி விட்டு நீள வாக்கில் படத்தில் காட்டியுள்ளபடி அரிந்து கொள்ளவும். அரை பெரிய வெங்காயத்தை சன்னமாக அரிந்து கொள்ளவும்.ஒரு வெறும் வாணலியில் கால் ஸ்பூன் எண்ணெய் விட்டு அதில் அரை ஸ்பூன் உளுத்தம் பருப்பு கடலைப் பருப்பு ஒரு மிளகாய் இவைகளுடன் 2 டேபிள்ஸ்பூன் நிலக்கடலைசேர்த்து சிவக்க வறுத்து கரகரவென்று பொடி செய்து வைத்துக் கொள்ளவும். மற்ற தேவையான மசாலா பொருட்கள் தாளிப்பு சாமான்களை எடுத்துக் கொள்ளவும்.

இப்போது நான்ஸ்டிக் கடாய் அல்லது அடி கனமான கடாயை ஒன்று எடுத்து அதில் ஒரு டேபிள்ஸ்பூன் எண்ணெயை ஊற்றி கொள்ளவும் சூடு ஏறியவுடன் அதில் கடுகு உளுத்தம்பருப்பு சேர்த்து பொரிந்தவுடன் கருவேப்பிலை சேர்க்கவும் பிறகு நறுக்கிய வெங்காயத்தை சேர்த்து பாதி அளவுக்கு வறுத்துக் கொள்ளவும். இதற்கிடையில் கோவைக்காயை சிறிது தண்ணீர் சேர்த்து குக்கரில் ஒரே சவுண்டு விட்டு வேக வைத்துக் கொள்ளவும். இந்தக் காயை வதங்கிய வெங்காயத்துடன் சேர்த்து ஒரு நிமிடம் வதக்கவும்.

பிறகு அனைத்து மசாலா பொடிகளையும் சேர்த்து பச்சை வாசம் போகும் வரை வதக்கிக் கொள்ளவும் தேவை என்றால் லேசாக தண்ணீர் தெளித்து நன்கு கலந்து விட்டு மூடி கொண்டு மூடி 5 நிமிடம் வேக விடவும். பிறகு வறுத்த கடலை பொடியை சேர்த்து நன்கு பிரட்டிக் கொள்ளவும். கடைசியாக பொடியாக நறுக்கிய கொத்தமல்லித்தழை சேர்த்துக் கொள்ளவும்.