எலும்புடன் கூடிய சிக்கன் துண்டுகளை சுத்தம் செய்து கழுவி தண்ணீர் வடித்து ஒரு கிண்ணத்தில் எடுத்துக் கொள்ளவும். இதில் மஞ்சள் தூள், சோயா சாஸ், பச்சை மிளகாய் சாஸ், வினிகர் மற்றும் உப்பு சேர்த்து நன்கு கலந்து விட்டு அரை மணி நேரம் ஊற வைக்கவும்.

பச்சை மிளகாய் இஞ்சி பூண்டை மிக்ஸியில் அரைத்துக் கொள்ளவும். காரம் அதிகம் விரும்புவோர் 2 பச்சை மிளகாய் கூடுதலாகச் சேர்த்துக் கொள்ளலாம்.

கடாயை அடுப்பில் வைத்து எண்ணெய் சேர்த்து சூடானதும் பெரிய வெங்காயத்தை பொடியாக நறுக்கி சேர்த்து வதக்கவும். இதில் அரைத்த பச்சை மிளகாய் இஞ்சி பூண்டு விழுதை சேர்த்து பச்சை வாசனை போகும் வரை சிறு தீயில் வதக்கி கொள்ளவும்.

பின் தீயை அதிகமாக்கிக் கொண்டு ஊற வைத்த சிக்கன் துண்டுகளை கடாயில் சேர்த்து 2 நிமிடம் வதக்கவும். கால் கப் தண்ணீர் சேர்த்து மூடி போட்டு சிறு தீயில் 15 நிமிடம் வேக விடவும்.

15 நிமிடங்கள் கழித்து சிக்கன் துண்டுகள் வெந்து உள்ளதா என்று பார்க்கவும் தேவைப்பட்டால் மேலும் 5 நிமிடங்கள் வேக விடவும். பிறகு சர்க்கரை சேர்த்து கலக்கவும்.

இதில் சோள மாவு கரைசலை சேர்த்து தீயை அதிகமாக வைத்து கை விடாமல் கிளறவும் இரண்டு நிமிடங்களில் சிக்கன் கிரேவி சாஸ் பதத்திற்கு கெட்டியாகிவிடும். மேலும் ஒரு நிமிடம் வேகவிட்டு அடுப்பை அணைக்கவும்.

குறிப்பு:
1. பச்சை மிளகாயின் காரம் விரும்புவோர் வெங்காயம் வதக்கும் பொழுது இரண்டு பச்சை மிளகாயைக் கீறிப் போட்டு வதக்கலாம்.
2. எலும்புடன் கூடிய சிக்கன் துண்டுகள் மற்றும் மிதமான அளவு துண்டுகளாக இருக்க வேண்டும்.
3. சிக்கன் சேர்க்கும் பொழுது தீயை அதிகமாக வைத்து வதக்குவதால் சிக்கனின் மேல் தோல் சுருங்கி அதில் உள்ள ஈரப்பதம் உள்ளே லாக் ஆகிவிடும் இதனால் நாம் சாப்பிடும் சிக்கன் துண்டுகள் ஜுசியாக இருக்கும்.