ஒரு அகன்ற பாத்திரத்தில் மாவு உப்பு சேர்த்துப் பிசைந்து கொள்ளவும். இதில் எண்ணெய் சேர்த்து மாவை உள்ளங்கைகளால் தேய்க்கவும். இவ்வாறு செய்வதனால் பரோட்டாவின் மாவு மிருதுவாக இருக்கும்.

பிறகு பால் கொஞ்சம் கொஞ்சமாக சேர்த்து மாவு பிசையவும். கூடவே குறிப்பிட்டுள்ள அளவில் தேவையான அளவு தண்ணீர் சேர்த்து மாவை சிறிது கெட்டியாக பிசைந்து கொள்ளவும். இரண்டு நிமிடங்கள் நன்கு பிசைய வேண்டும். மேலும் ஒரு தேக்கரண்டி எண்ணெய் சேர்த்து மாவை நன்கு குத்தி பிசைய வேண்டும். இவ்வாறு இரண்டு நிமிடங்கள் பிசைந்த பின் மூடி போட்டு 20 நிமிடம் ஊறவைக்கவும்.

ஆலு பரோட்டா செய்வதற்காக பெரிய மாவுகீகிழங்கை தேர்ந்தெடுக்க வேண்டும். இதனை வேகவைத்து ஆறிய பின் சிறிய பல்கொண்ட துருவியில் துருவிக்கொள்ளவும். கட்டிகள் சிறிதும் இருக்கக் கூடாது. இதோடு குறிப்பிட்டுள்ள மசாலா பொருட்களை சேர்க்கவும்.

கூடவே பொடியாக நறுக்கிய இஞ்சி, பச்சை மிளகாய், புதினா மற்றும் மல்லி இலைகளை சேர்த்து, ஒரு தேக்கரண்டி எண்ணெயை யும் சேர்த்து நன்கு பிசைந்து உருட்டி கொள்ளவும்.

இப்போது ஊரிய மாவிலிருந்து தேவைப்பட்ட அளவில் பந்துகளாக உருட்டிக் கொள்ளவும். இதை உள்ளங்கை அளவு விரித்து நடுவே எலுமிச்சை அளவு உருளைக்கிழங்கு மசாலாவை வைக்கவும். அதன் மேல் கொஞ்சம் வர மாவு தூவி படத்தில் காட்டியுள்ளபடி சுருக்கம் பிடித்து மூடிக் கொள்ளவும். பின் தேவையான அளவு வர மாவு தூவி பரோட்டாவை போல மசாலா வெளியே வராமல் கவனமாக விரித்துக் கொள்ளவும்

சூடான தோசைக்கல்லில் போட்டு நெய் சேர்த்து இரண்டு பக்கமும் திருப்பி போட்டு சுட்டு எடுக்கவும். நெய் சேர்ப்பதனால் பரோட்டா மிருதுவாக இருக்கும். விருப்பப்பட்டால் எண்ணெய் கூட சேர்க்கலாம்.

சூடான பரோட்டாவின் மேல் வெண்ணெய் தடவி வெங்காயம் பச்சை மிளகாயோடு சாப்பிட சுவையாக இருக்கும். அல்லது தயிர்ப் பச்சடியுடன் சாப்பிடலாம்.