આઇસ હલવો (Ice Halwa recipe in Gujarati)

એક પેનમાં ગેસ ચાલુ કર્યા વગર ઓગળેલું ઘી, મેંદો, દૂધ અને ખાંડ લઇ મિક્સ કરવા. બધું બરાબર ગાંઠ વગર એકરસ મિક્સ થઇ જાય પછી ગેસ ચાલુ કરવો.

ફ્લેમ બિલકુલ ધીમી રાખી એકધારું હલાવવું. ચમચો છોડવો નહીં. પળ માટે પણ હલાવવાનું અટકાવવાનુ નથી. પહેલી 5 મિનિટમાં મિશ્રણ ખાંડ ઓગળવાથી પાતળું થશે. પછી ધીમે ધીમે ઘટ્ટ થવા લાગશે. 15-20 મિનિટ નોનસ્ટોપ હલાવ્યા પછી મિશ્રણ પેન છોડવા લાગશે. આ સ્ટેજ પર થોડુંક મિશ્રણ પ્લેટમાં લઇ 1 મિનિટ માટે ઠંડુ કરવું. અને પછી અડવાથી આંગળી પર ચોંટે નહીં અને ગોળી વળે તો તે તૈયાર છે એમ માનવું. આ દરમિયાન ગેસ પરના મિશ્રણને હલાવતા રહેવું. થવા આવે એટલે તેમાં રોઝ એસેન્સ નાખી મિક્સ કરી લેવું.

એક મોટું બટર પેપર કે પ્લાસ્ટિક શીટ લઇ તેના પર ઘી લગાવીને રાખવું. બનેલા મિશ્રણને તેના પર રેડવું. વેલણ પર ઘી લગાવી ધીરે ધીરે મિશ્રણને ફેલાવતા જવું. સહેજ ઠંડું પડે એટલે પછી જલ્દીથી જાડા વેલણ વડે થાય તેટલું પાતળું અને લંબચોરસ વણવું. જેટલું લેયર પાતળું હશે તેટલો હલવો જલ્દીથી સૂકાશે અને તૂટે તેવો કડક બનશે.

તરત જ વણેલા રોટલા પર બધી બાજુ ઇલાયચી પાઉડર, બદામ અને પિસ્તા ની કતરણ પાથરી બીજું બટર પેપર મૂકી ફરી વેલણથી વણવું. જેથી પાથરેલું બધું દબીને સેટ થઇ જાય. પછી આ રોટલાને 5-6 કલાક માટે ખુલ્લો સૂકવવા દેવો.

બરાબર સૂકાય એટલે કાતર અથવા કટરથી બટર પેપર સાથે જ મોટા ચોરસ ટુકડા માં કાપી લેવો. અને બીજા 5-6 કલાક માટે ફ્રીઝમાં પ્લેટમાં કાઢી ખુલ્લો જ મૂકવો.

પછી આઇસ હલવો અડતાં સાથે તૂટે તેવો થઇ ગયો હશે. તેને ડબ્બામાં ભરી ફ્રીઝમાં 15 દિવસ સુધી રાખી શકાશે.