સૌથી પહેલા બોઇલ રાઇસ તૈયાર રાખીશું. બન્યા બાદ 1/2 થી 1 કલાક મૂકી રાખવાથી વધારે સરસ છૂટો પુલાવ બનશે. તો તેને થોડાક વહેલા બનાવી દેવા. હું ઓસાવવાની જગ્યાએ બેઠો ભાત બનાવવાનું પસંદ કરું છું. તો આ રીતે સારા બને છે. તેના માટે ચોખાને 2-3 વાર સારી રીતે પાણીથી ધોઇને 10-15 મિનિટ માટે પલાળવા. પછી એક નોનસ્ટીક કઢાઇમાં ચોખાથી બમણા પાણી સાથે કુક થવા માટે મૂકવા.તેમાં ચક્રફૂલ, તમાલપત્ર, તજ, લવિંગ, મીઠું અને ઘી નાખવું. ખુલ્લા જ મિડિયમ ગેસ પર રંધાવા દેવા.

10 મિનિટમાં ચેક કરવું. તળિયે પાણી ના રહે એટલે ગેસ બંધ કરવો. પાણી માપસર નું જ મૂકવું જેથી ભાત એકદમ છૂટા બને.તેને 1/2 કલાક માટે સિજવા દેવા.

સાથે એક નાના બાઉલમાં 1/4 કપ જેટલું પાણી ગરમ કરી સૂકા લાલ મરચાને 1/2 કલાક માટે પલાળવા. પછી તેને મિક્સર જારમાં લઇ તેમાં લસણ, આદું, મીઠું, લાલ મરચું અને જીરુ ઉમેરી જરુર મુજબ પાણી નાખી ચટણી બનાવવી.

લાલ ચટણીને એક બાઉલમાં લેવી. ફણસી, ગાજર, બટાકા ને ઝીણા સમારી, તેને અમેરિકન મકાઈના દાણા અને લીલા વટાણા સાથે 3-4 મિનિટ માટે માઇક્રોવેવ કરી બાફી લેવા. બાફતી વખતે જરુર મુજબ પાણી ઉમેરવું.

બફાઇ જાય એટલે પાણી કાઢી લેવું. બધા કલરના કેપ્સીકમ, ડુંગળી અને ટામેટાને પણ ઝીણા સમારી લેવા.

હવે એક તવામાં તેલ અને બટર ગરમ મૂકી તેમાં હીંગ,જીરુ નાખી ડુંગળી સાંતળવી. તેમાં બધા કેપ્સીકમ ઉમેરી ફાસ્ટ ગેસ પર સાંતળવા.

પછી તેમાં બનાવેલી લસણની લાલ ચટણી ઉમેરવી.કુક થાય એટલે ટામેટાં ઉમેરવા. પછી બાકીનું બાફેલું શાક પણ ઉમેરી લેવું.2 મિનિટ માટે સંતળાવા દેવું.

પછી તેમાં પાઉંભાજી મસાલો, ગરમ મસાલો, હળદર, મીઠું નાખી બરાબર મિક્સ કરી લેવું. અને છેલ્લે બનેલા ભાત ઉમેરી બરાબર મિક્સ કરી લેવા. જો તવો નાનો હોય તો બનેલો મસાલો ભાતમાં ઉમેરી મિક્સ કરી કુક કરવું.

છેલ્લે સમારેલી કોથમીર અને લીંબુનો રસ ઉમેરી મિક્સ કરી લેવો. તવા પુલાવ તૈયાર છે. રાયતા, પાપડ સાથે ગરમાગરમ પુલાવ સર્વ કરવો.

ભાજીપાવ બનતી હોય ત્યારે તે જ તવામાં થોડું સમારેલું શાક સાંતળી બાફેલા ભાત ઉમેરી આ પુલાવ ફટાફટ બનતો હોય છે. જેમાં પાઉંભાજી ની ભાજીનો ખાસ સ્વાદ હોય છે.