એક કડાઈ માં થોડું ઘી ઉમેરવું. ઘી ગરમ થાય એટલે તેમાં થોડો થોડો ગુંદર ઉમેરીને ફુલાવી લેવો. બધો ગુંદર તળાઈ જાય અને ઠંડો પડે એટલે એક વાડકી ની મદદથી તેનો ભૂક્કો કરી લેવો.

એ જ કડાઈ માં 1 ટેબલસ્પૂન ઘી ઉમેરી ધીમા તાપે કાજુ બદામ ને શેકી લેવા. હવે તેમાં છીણેલું કોપરું ઉમેરી હલકા ગુલાબી રંગ નું શેકી લેવું.

ચાસણી બનાવવા માટે એક વાસણમાં ખાંડ અને પાણી ઉમેરીને મીડીયમ તાપે ગરમ કરવું. બે તારની ચાસણી બને એટલે ગેસ બંધ કરી દેવો.વચ્ચે વચ્ચે હલાવતા રેહવું. ચાસણી તૈયાર થઇ છે કે નહીં એ જોવા માટે એક પ્લેટમાં એક ટીપું ચાસણી પાડી ઠંડી થવા દેવી. હવે પ્લેટ ને થોડી વાંકી કરવી. જો ટીપું હલે નહીં તો ચાસણી તૈયાર છે.

હવે બાકીનું ઘી કડાઈમાં ઉમેરીને તેમાં છીણેલો માવો ઉમેરવો. માવો હલકો ગુલાબી રંગનો થાય અને ઘી છૂટું પડે ત્યાં સુધી મીડીયમ તાપ પર સાંતળવો.

હવે તેમાં કાજુ, બદામ, કોપરું અને વાટેલો ગુંદર ઉમેરીને બધું બરાબર હલાવી લેવું. હવે તેમાં ઈલાયચીનો પાવડર, જાયફળનો પાવડર, સૂંઠ અને બત્રિસુ ઉમેરીને હલાવી લેવું. તૈયાર થયેલી ચાસણી ઉમેરી ને બધું બરાબર હલાવી લેવું. ગેસ બંધ કરી પાંચ મિનિટ રહેવા દેવું.

હવે ગ્રીસ કરેલા ટીનમાં અથવા તો થાળીમાં ગુંદર પાક ને લઇ લેવો અને એક વાડકી ની મદદથી એકસરખું ફેલાવી લેવું. અડધા કલાક પછી તેમાં પસંદગી મુજબના કટકા કરીને એક થી બે કલાક સેટ થવા રહેવા દેવું. હવે ગુંદર પાક ને એર ટાઈટ કન્ટેનરમાં સ્ટોર કરી લેવો. એક બે દિવસ બહાર રાખ્યા પછી ગુંદર પાકને રેફ્રિજરેટરમાં રાખવો કેમકે એમાં માવો હોવાથી રૂમ ટેમ્પરેચર પર વધારે દિવસ સ્ટોર કરી શકાતો નથી.