કાબુલી ચણાને ધોઈને આઠથી દસ કલાક માટે પલાળી રાખવા. હવે તેમાં એક તજનો ટુકડો, 2 ઇલાયચી, 2 લવિંગ અને એક તમાલ પત્ર ઉમેરી ને પ્રેશર કૂકરમાં બાફી લેવા.

તજ, લવિંગ, ઈલાયચી અને એલચા ને એક મિક્સરમાં નાખીને અધકચરા વાટી લેવા.

એક પોટ માં તેલ ગરમ થાય એટલે તેમાં તમાલપત્ર અને લાલ મરચાના ટુકડા ઉમેરી જીરું ઉમેરવું. જીરુ હલકું બ્રાઉન થાય એટલે તેમાં હીંગ ઉમેરીને કાજુ અને દ્રાક્ષ ઉમેરવા. કાજુ દ્રાક્ષ હલકા ગુલાબી રંગના થાય એટલે આખા મસાલા નો પાઉડર ઉમેરી દેવો. હવે તેમાં હળદર, લાલ મરચું, ધાણાજીરું અને મીઠું ઉમેરીને બધું બરાબર હલાવી લેવું. બાફેલા ચણા ઉમેરી બધું મિક્સ કરી લેવું. બેથી ત્રણ મિનિટ સુધી ધીમા તાપે પકવવું.

એક વાસણમાં દહીં અને મેંદો મિક્સ કરીને દહીંને ફેંટી લેવું. મેંદો ના નાખવો હોય તો પણ ચાલે પણ દહીં ફાટી ના જાય એટલા માટે મેંદો મિક્સ કરી શકાય. આ મિશ્રણને ચણામાં ઉમેરીને સતત હલાવતા રહેવું. મીડીયમ તાપે ચણા માં એક ઉભરો ના આવે ત્યાં સુધી સતત હલાવવું.

હવે એમાં પનીરના ટુકડા ઉમેરી દેવા. પનીર ના ઉમેરવું હોય તો ચાલે. એક વાસણમાં ચોખાના લોટમાં થોડું પાણી ઉમેરીને તેની પેસ્ટ બનાવી લેવી. ચોખાના ઘોળને કરી માં ઉમેરીને બરાબર મિક્ષ કરી લેવું. હવે તેમાં ખાંડ ઉમેરવી. ધીમા તાપે ગ્રેવીને 10 મિનીટ સુધી ગરમ થવા દેવી. હવે તેમાં 2 ટેબલ ચમચી ઘી અને લીલા ધાણા ઉમેરીને બધું બરાબર હલાવી ગેસ બંધ કરી દેવો.