ક્રીમ સ્ટાઇલ સ્વીટકોર્ન બનાવવા માટે સ્વીટકોર્નના દાણા ને ઉકળતા પાણીમાં ઉમેરી સાથે ખાંડ અને મીઠું ઉમેરવું. હવે તેને 15 મિનિટ માટે મીડીયમ તાપ પર પકાવવું. હવે કોર્નફ્લોર ને પાણીમાં મિક્સ કરીને સ્લરી બનાવી લેવી. આ સ્લરીને સ્વીટકોર્ન માં ઉમેરીને થોડું જાડું થાય ત્યાં સુધી પકાવવું. હવે તેને ઠંડુ થવા દેવું. સૂપ બનાવવા માટે ક્રીમ સ્ટાઇલ સ્વીટકોર્ન તૈયાર છે. ત્રણ થી ચાર દિવસ માટે એને રેફ્રિજરેટરમાં સ્ટોર કરી શકાય. આ વસ્તુનો ઉપયોગ કરીને બીજી વાનગીઓ પણ બનાવી શકાય.

એક પોટ માં બટર ગરમ થાય એટલે તેમાં આદુ, લસણ અને લીલા મરચાની પેસ્ટ ઉમેરવી. એક મિનિટ માટે સાંતળીને તેમાં લીલા કાંદા નો સફેદ ભાગ ઉમેરીને એક મિનિટ માટે સાંતળવું. હવે તેમાં ગાજર અને ફણસી ઉમેરીને ફરી એક મિનિટ માટે સાંતળવું.

હવે તેમાં મીઠું, મરી, ખાંડ અને વિનેગર ઉમેરી બધું બરાબર હલાવી લેવું. ત્યારબાદ તેમાં ક્રીમ સ્ટાઈલ સ્વીટકોર્ન અને ગરમ પાણી ઉમેરવું. ક્રીમ સ્ટાઇલ સ્વીટકોર્ન માં પણ મીઠું છે એ વાતનું ધ્યાન રાખવું.

કોર્નફ્લોર અને પાણીને ભેગા કરીને સ્લરી બનાવી લેવી. જ્યારે સૂપ ઉકળવા માંડે ત્યારે તેમાં કોર્નફ્લોરની સ્લરી ઉમેરીને બરાબર હલાવી લેવું. થોડું જાડું થાય ત્યાં સુધી પકાવવું. હવે તેમાં લીલા કાંદા ના પાન ઉમેરવા.

ફ્રેશ ક્રીમ ઉમેરીને એક મિનિટ માટે પકાવવું. ત્યારબાદ ગેસ બંધ કરી દેવો.