முதலில் பிரஷர் குக்கரில் மட்டன் மற்றும் தேவையான அளவு தண்ணீர் சேர்த்து மிதமான சூட்டில் 5விசில் வரை வேக வைக்கவும். சீரக சம்பா அரிசியை நன்கு கழுவி 20நிமிடம் ஊற வைக்கவும்.

மசாலா தூள் அரைக்க மிக்சி ஜாரில் தனியா, முந்திரி, சீரகம், கல்பாசி, ஏலக்காய், மிளகு, பிரியாணி இலை, அன்னாசி பூ, பட்டை, ஜாவித்திரி, கிராம்பு, ஜாதிக்காய், சோம்பு ஆகியவற்றை நன்கு பொடியாக அரைத்து தனியாக வைக்கவும். அடுத்து மசாலா விழுதிற்கு சின்ன வெங்காயம், பச்சை மிளகாய், பூண்டு, இஞ்சி சேர்த்து தண்ணீர் சேர்த்து விழுதாக அரைக்கவும்.

ஒரு அகல பாத்திரத்தில் எண்ணெய் மற்றும் நெய் சேர்த்து அதில் அரைத்த வெங்காய விழுதை சேர்த்து வதக்கவும். வெங்காய விழுது நிறம் மாறி பச்சை வாசனை போன பின் அரைத்த மசாலா தூள், மஞ்சள் தூள், மிளகாய் தூள், கல்லுப்பு சேர்த்து மிதமான தீயில் வதக்கவும்.

பின் வேக வைத்த மட்டன் தண்ணீர் இல்லாமல் சேர்த்து கிளறவும். இதில் எலுமிச்சை சாறு, தயிர், கொத்தமல்லி இலை, புதினா இலை சேர்த்து நன்கு கிளறவும். இதனுடன் மட்டன் வேக வைத்த தண்ணீர் சேர்க்கவும். அடுத்து ஊற வைத்த அரிசி மற்றும் சூடு தண்ணீர் சேர்த்து (1கப் அரிசிக்கு 2கப் தண்ணீர் வீதம்)கலக்கவும்.

பாத்திரத்தை மூடி 10 நிமிடம் மிதமான தீயில் சமைக்கவும். அரிசி பாதி வெந்ததும் அடுப்பில் தோசைக்கல் வைத்து அதன் மீது பிரியாணி பாத்திரத்தை வைத்து அதில் நெய் ஊற்றி மூடவும். பின் மூடியின் மேல் கனமான பாத்திரம் வைத்து மிதமான தீயில் 20நிமிடம் தம் கட்டி எடுத்தால் சுவையான மட்டன் பிரியாணி தயார்.