முதலில் இட்லி அரிசி மற்றும் பச்சரி இரண்டையும் ஒன்றாக கலந்து நன்றாக கழுவி 5மணி நேரம் ஊற வைக்கவும். அதே போல் வெள்ளை உளுந்து மற்றும் வெந்தயம் கலந்து நன்றாக கழுவி 3லிருந்து 5மணி நேரம் வரை ஊற வைக்கவும். அவலை நன்றாக கழுவி 1/2மணி நேரம் ஊற விடவும்.

முதலில் கிரைண்டரில் உளுந்து வெந்தய கலவையை அரைக்கவும். உளுந்து மாவு அரைக்க குளிர்ந்த நீரை (ஐஸ் வாட்டர்) பயன்படுத்தவும். (குளிர்ந்த நீரை பயன் படுத்துவதனால் கிரைண்டர் மோட்டார் அதிக சூடாகாமல் இருக்கும். இதனால் மாவின் உபரி அதிகமாகும். உளுந்து அரைக்கும் போது அதிகம் தண்ணீர் சேர்க்க கூடாது. தேவைக்கு ஏற்ப கொஞ்சம் கொஞ்சமாக அவ்வப்போது சேர்த்து அரைக்கவும். 2ஆம் படத்தில் உள்ளவாறு கையில் மாவை அள்ளினால் ஊற்றாமல் திக்காக இருக்க வேண்டும்.

உளுந்த மாவை அதிகமாக 20லிருந்து 30நிமிடம் அரைத்தால் போதும். பின்னர் உளுந்து மாவை அள்ளிய உடன் கிரைண்டரில் அவலை சேர்த்து 1நிமிடம் ஓட விடவும். பின்னர் 1கப் அளவு குளிர்ந்த நீரை கிரைண்டரில் சேர்த்து பின்னர் அரிசியை சேர்த்து அரைக்கவும். (தண்ணீர் சேர்த்த பின் அரிசி சேர்ப்பதால் அரிசி கிரைண்டரின் கல்லில் ஒட்டாது).

அவ்வப்போது சிறிது சிறிதாக குளிர்ந்த நீரை சேர்த்து நன்றாக (ரவை போல் இல்லாமல் இன்னும் சற்று நைசாக அரைக்கவும்). அரைக்கவும். அரிசி மாவை 3/4மணி நேரம் முதல் 1மணி நேரம் வரை அரைக்கலாம். (அவரவர் கிரைண்டருக்கு ஏற்ப நேரம் மாறுபடும்). பின்னர் அரைத்த அரிசிமாவை உளுந்த மாவுடன் நன்றாக கலக்கவும். (தற்போது உப்பு சேர்க்க தேவை இல்லை).

மாவை குறைந்தது 8மணி நேரம் புளிக்க விடவும். பின்னர் மறுநாள் பார்க்கும் போது மாவு படத்தில் உள்ளவாறு நுரை போன்று புளித்து காணப்படும். அந்த மாவை கரண்டிக் கொண்டு ஒருமுறை நன்றாக கலந்து பின்னர் அதில் தேவையான மாவை மட்டும் தனியாக எடுத்து உப்பு சேர்த்து இட்லி அல்லது தோசை வார்த்து உண்ணலாம்.

மாவில் உப்பு சேர்க்காமல் பிரிஜ்ஜில் வைத்து பயன் படுத்துவதனால் மாவு நீர்த்து போகாமல் இருக்கும். மாவில் சோடா சேர்க்க தேவையில்லை. இட்லி தட்டில் துணி பயன்படுத்தி இட்லி சுடுவதனால் சூடாக பரிமாற இயலும். மிகவும் மிருதுவான இட்லி தயார்.