மேற்கூறிய தேவையான பொருட்கள் அனைத்தையும் தயாராக எடுத்து வைத்துக் கொள்ளவும். அரிசியை நன்கு கழுவி தண்ணீர் ஊற்றி நான்கு மணி நேரம் வரை ஊற வைக்கவும். அரை டம்ளர் வெல்லம் நன்றாக பொடித்து வைத்துக் கொள்ளவும். அரை டம்ளர் தேங்காய் துருவல் எடுத்துக் கொள்ளவும்.

நான்கு மணி நேரம் கழித்து அரிசியில் உள்ள தண்ணீரை வடித்துக்கொள்ளவும். வெள்ளரிக்காயை கழுவிவிட்டு கேரட் துருவியில் துருவிக் கொள்ளவும். துருவிய வெள்ளரிக்காயை வடிகட்டி பயன்படுத்தி நன்றாக கைகளால் பிழிந்து சாறு எடுத்துக் கொள்ளவும்.

தேங்காய்த்துருவல்,வெல்லம், தூள் உப்பு, ஊறவைத்த (தண்ணீர் வடித்த) அரிசி, இவற்றை மிக்ஸி ஜாரில் சேர்த்து, அதனுடன் வடித்த வெள்ளரிக்காய் சாற்றை சேர்த்து கரகரப்பாக ரவை பதத்திற்கு அரைத்துக் கொள்ளவும். தண்ணீர் தேவை என்றால் ஒரு ஸ்பூன் ஊற்றி அரைத்துக் கொள்ளவும்.

அரைத்த மாவை வழித்தெடுத்து வேறு பாத்திரத்திற்கு மாற்றிக் கொள்ளவும். இதில் வெள்ளரிக்காய் துருவலை சேர்த்துக் கொள்ளவும். தேவை என்றால் கொஞ்சமாக தண்ணீர் கலந்து மாவை கரைத்து கொள்ளவும். நீர்க்க கரைக்கக் கூடாது. ரவா இட்லி பதத்திற்கு கரைத்துக்கொள்ளவும். படத்தில் காட்டியுள்ளபடி.

வாழை இலையில் நெய் தடவி இட்லி தட்டில் வைக்கவும். அடுப்பில் இட்லி பாத்திரத்தை வைத்து தண்ணீர் ஊற்றி கொதிக்கவிடவும். நெய் தடவிய வாழை இலை தட்டில் மாவை அள்ளி வைக்கவும். பிறகு இன்னொரு வாழை இலையால் மூடி, இட்லி பாத்திரம் மூடியை போட்டு மூடி பத்து நிமிடம் வரை வேக விடவும்.

இட்டிலி வெந்து விட்டதா என்று பார்த்து விட்டு தட்டை வெளியில் எடுத்து இட்லியை தனியாக எடுக்கவும். இந்த வெள்ளரிக்காய் இனிப்பு இட்லி வாழை இலை வாசத்துடன் நெய் ஊற்றி சாப்பிட சுவையாக இருக்கும்.குறிப்பாக குழந்தைகளுக்கு மிகவும் பிடிக்கும்.