மல்டிவிட்டமின் லட்டு (ஆளி விதை/எள்ளு/வேர்க்கடலை /நட்ஸ் லட்டு)

ஆளிவிதை 1பங்கு எனில் கருப்பு அல்லது வெள்ளை எள் 1/2பங்கு மற்றும் வேர்க்கடலை 1/4பங்கு எடுத்துக் கொள்ளவும்.

மேலும் கருப்பட்டி அல்லது வெல்லம் அவரவர் இனிப்பு சுவை தேவைக்கு ஏற்ப எடுத்து கொள்ளவும். மிதமான தீயில் முதலில் ஆழிவிதையை வறுத்துக் கொள்ளவும். எள்ளை போன்று ஆளியும் வெடிக்கும் அதுவரை வறுத்து கொள்ளவும். ஆனால் அதே நேரம் அதிக நேரம் வறுத்தால் எண்ணெய் பிரிந்து வர ஆரம்பிக்கும் எனவே 5நிமிடம் வரை மட்டுமே வறுத்து ஆற விட்டு பின் மிக்சியில் அரைத்து கொள்ளவும். மிக்சியிலும் அதிக நேரம் அரைக்க கூடாது. விட்டு விட்டு 3முறை ஓட்டினால் போதும்.

அதே முறையில் எள்ளயும் வறுத்து அரைத்து கொள்ளவும். பின்னர் வேர்க்கடலையை நன்றாக வறுத்து ஆறவிட்டு சற்று கொரகொரப்பாக அரைத்து எடுத்து கொள்ளவும்.

பின்னர் அரைத்த ஆளி பவுடர், எள்ளு பவுடர், வேர்க்கடலை பொடி ஆகியவற்றை ஒன்றாக சேர்த்து நன்றாக கலந்து கொள்ளவும். அதனுடன் நட்ஸ் பவுடர் இருந்தால் 3டேபிள் ஸ்பூன் சேர்த்து கலந்து கொள்ளவும். இல்லை எனில் பாதாம், பிஸ்தா, முந்திரி, வாழ்நாட் எது உள்ளதோ அதை மிதமான தீயில் வறுத்து கொரகொரப்பாக அரைத்து கலந்து கொள்ளவும்.

பாதாமை மட்டும் முதலில் நீரில் ஊற வைத்து தோலை நீக்கி பின்னர் வறுத்து கொள்ளவும். பின்னர் கருப்பட்டி அல்லது வெல்லதோடு 1/4டம்ளர் தண்ணீர் சேர்த்து கரையும் வரை கொதிக்க விட்டு பின்னர் வடிக்கட்டி கொள்ளவும். பின்னர் மீண்டும் அடுப்பில் வைத்து 1கம்பி பதம் வரும் வரை கொதிக்க விடவும்.

பின்னர் அரைத்த மாவை சேர்த்து நன்கு கிளறவும். மேலும் அதில் 2சிட்டிகை ஏலக்காய் தூள் சேர்த்து கிளறவும். பின்னர் நன்கு ஆற விட்டு லட்டு போல் உருட்டி எடுக்கவும்.