ચણાની દાળ તથા ચોખાને એક રાત પહેલા 8 કલાક પાણીમાં પલાળીને રાખો. સવારે તેને પાણીમાંથી નીતારી અડધો કપ પાણી તથા દહીં સાથે મિક્સરમાં ક્રશ કરી નાંખો. આ ખીરુ ન તો બહુ ગાઢ થવુ જોઈએ ન તો પતલું.

આ ખીરાને એક મોટા વાડકામાં કાઢી તેમાં નમક અને હળદર પાઉડર નાંખી વ્યવસ્થિત રીતે મિક્સ કરી લો. આ મિશ્રણને આથો આવે ત્યાં સુધી હૂંફાળી જગ્યાએ 6-8 કલાક માટે રહેવા દો.

એક થાળીની સપાટી પર તેલ લગાવી ચીકણી કરી લો. ઢોકળા બનાવવા માટે ઢોકળાના કૂકરમાં 2-3 ગ્લાસ પાણી નાંખીને તેને ગરમ થવા દો. ઢોકળાના ખીરામાં 1 મોટી ચમચી તેલ નાંખો અને હવે આદુ-મરચાની પેસ્ટ નાંખી બરાબર હલાવી લો. ત્યાર પછી તેમાં ઈનો ફ્રૂટ સોલ્ટ કે બેકિંગ સોડા ઉમેરી ખીરુ બરાબર હલાવી લો. થાળીમાં ખીરુ પાથર્યા પછી જીરુ પાઉડર અને લાલ મરચાનો પાઉડર છાંટી તેને બફાવા દો.

10-15 મિનિટ પછી ચાકુની અણી નાંખીને ઢોકળા ચડી ગયા છે કે નહિ તે ચેક કરો. જો તે ચાકુને ચોંટે તો મતલબ હજુ તે બરાબર ચડ્યા નથી અને તેને થોડી વધારે વાર કૂકરમાં બફાવા દો. ઢોકળા બફાઈ જાય અને થાળી સહેજ ઠરે એટલે તેને શક્કરપારા જેવા શેપમાં કાપી લો. વઘારિયામાં બે ચમચી તેલ, રાઈ,જીરુ નાંખી વઘાર તતડવા દો. રાઈ-જીરુ તતડે પછી મીઠો લીમડો નાંખો. આ વઘાર હવે ઢોકળાની ડિશ પર પાથરી દો. તમારા ખાટા ઢોકળા તૈયાર છે.