சீசி வெஜ் பீட்சா

முதலில் ஒரு கிண்ணத்தில் ஈஸ்ட், வெதுவெதுப்பான தண்ணீர் மற்றும் சர்க்கரை சேர்த்து கலக்கிக் கொள்ளவும். இதை 15 நிமிடங்கள் ஈஸ்ட் ஆக்டிவ் செய்ய வைக்கவும்.

ஒரு பெரிய பாத்திரத்தில் 3 கப் மைதா மாவு, பால் பவுடர் சேர்க்கவும்.

இதனோடு சர்க்கரை மற்றும் உப்பு சேர்த்து பிசைந்து கொள்ளவும்.

அதன்பின் ஆக்டிவ் செய்யப்பட்ட ஈஸ்ட் மற்றும் வெதுவெதுப்பான ஒரு கப் தண்ணீர் சேர்த்து மாவை 10 நிமிடங்கள் நன்கு பிசைந்து கொள்ளவும்.

பிசைந்த மாவை உருட்டி ஒரு கிண்ணத்தில் வைத்து 45 நிமிடங்கள் மூடி வைக்கவும்.

இப்பொழுது பீசா சாஸ் செய்ய தக்காளியை தண்ணீரில் வேக விடவும். தோல் தனியே வரும் சமயத்தில் அடுப்பை அணைத்து ஆற விட்டு அரைத்துக்கொள்ளவும்.

ஒரு பாத்திரத்தில் ஒரு தேக்கரண்டி எண்ணெய் ஊற்றி சூடுபடுத்தவும். இதில் அரைத்த தக்காளி விழுது உப்பு மற்றும் சர்க்கரை சேர்க்கவும்.

இதனோடு ஆரிகானோ, சில்லி ப்ளேக்ஸ் மற்றும் வினிகர் சேர்த்து நன்கு கொதிக்கவிடவும்.

45 நிமிடங்கள் கழித்து பிசைந்து வைத்த மாவு இரட்டிப்பாக பொங்கி வரும். இதனை கைகளால் அழுத்திப் பிசையவும். இந்த மாவை 2 உருண்டைகளாக பிடிக்கவும்.

மீண்டும் அதனை மூடி வைத்து பத்து நிமிடங்கள் கழித்து,ஒரு அரை இன்ச் மொந்தத்தில் தேய்த்து எடுக்கவும்.

ஒரு பீட்சா தட்டில் வெண்ணை தடவி கொள்ளவும். அதன்மீது தேய்த்த பீட்சாவை வைத்து ஓரங்களை அழுத்தி விடவும். நடுவில் போர்க் ஸ்பூன் கொண்டு குத்தி விடவும்.

இரண்டு மேஜைக்கரண்டி பிசா சாஸை நடுவில் தடவவும். ஓரங்களில் அரை இன்ச் தடவ வேண்டாம்.பீசாவின் மேல் அலங்கரிக்க காய்கறிகளை தயார் செய்து வைத்துக் கொள்ளவும்.

நறுக்கிய காய்கறிகளை ஒன்றன் மேல் ஒன்றாக பரவலாக போட்டுக் கொள்ளவும். விருப்பத்திற்கேற்ப பேபி கார்ன், பன்னீர், சிக்கன் போன்றவற்றை சேர்த்துக் கொள்ளலாம்.

அதன்மீது துருவிய இரண்டு வகை சீஸ் களையும் சேர்த்துக் கொள்ளலாம். இப்போது அடுப்பின் மீது ஒரு இரும்பு தவாவை காய வைக்கவும்.

தவா சூடானதும் சிம் செய்து விடவும். இதன் மேல் பீசா தட்டை வைக்கவும். இதற்கு மேல் சில்லி ஃப்ளேக்ஸ் மற்றும் ஓரிகானோ தூவிக் கொள்ளலாம். இதனை மூடி வைத்து 20 முதல் 25 நிமிடங்கள் குறைவான தீயில் வேக விடவும்.

குழந்தைகள் முதல் பெரியவர்கள் வரை அனைவரும் விரும்பக்கூடிய பீசா சுத்தமாகவும் சுகாதாரமாகவும் நாம் வீட்டிலேயே தயார் செய்து கொள்ளலாம்.