સૌ પ્રથમ ચોખા અને મગની દાળને ભેગા કરીને પાણી થી ત્રણ થી ચાર વાર ધોઈ લેવા.

પ્રેશર કુકરમાં તેલ ગરમ થાય એટલે તેમાં બધા આખા મસાલા ઉમેરી દેવા. હવે તેમાં રાઈ ઉમેરીને રાઈ ફૂટે એટલે તેમાં હિંગ અને એકદમ પાતળા અને લાંબા સમારેલા કાંદા ઉમેરી ને કાંદા જ્યાં સુધી બ્રાઉન રંગના થઈ જાય ત્યાં સુધી સાંતળવું. આદુ-લસણની પેસ્ટ ઉમેરીને થોડી વાર હલાવવું. હવે તેમાં હળદર, લાલ મરચું, ગરમ મસાલો અને મીઠું ઉમેરીને મિક્સ કરી લેવું. હવે તેમાં બટાકા ના ટુકડા અને વટાણા અથવા તુવેર ઉમેરીને મિક્સ કરી લેવું.

હવે તેમાં ચોખા અને દાળ ઉમેરીને 4.5 કપ પાણી ઉમેરીને બધું બરાબર હલાવી લેવું. જો છૂટી ખીચડી પસંદ હોય તો પાણી થોડું ઓછું ઉમેરવું.

કુકર બંધ કરીને હાઈ હિટ પર ત્રણ થી ચાર વ્હિસલ વગાડવી. હવે કુકર ને એની જાતે ઠંડું થવા દેવું.

કઢી બનાવવા માટે દહીં અને ચણાના લોટને વ્હિસ્ક ની મદદથી મિક્સ કરી લેવું જેથી કરીને એમાં ગઠ્ઠા ના બને. હવે તેમાં 2 કપ પાણી ઉમેરીને પાછું વ્હિસ્ક ની મદદથી હલાવી લેવું.

એક પોટ માં તેલ ગરમ થાય એટલે તેમાં રાઈ, જીરુ અને મેથી ઉમેરવા. રાઈ ફૂટે એટલે તેમાં હિંગ, કરી પત્તા અને ધાણા ઉમેરવા. હવે તેમાં આદુ-લસણની પેસ્ટ ઉમેરી એની સાથે હળદર, લાલ મરચું અને મીઠું ઉમેરી બધું બરાબર હલાવી લેવું. 1/2મિનિટ સુધી સાંતળી ને તેમાં દહીં અને ચણાના લોટનું મિશ્રણ ઉમેરીને હલાવી લેવું. મીડીયમ થી ધીમા તાપ પર સતત હલાવતા રહેવું.

જ્યારે એમાં એક ઉભરો આવે એટલે તેમાં ધાણા જીરુ ઉમેરીને હલાવી લેવું અને બે મિનિટ પછી ગેસ બંધ કરી દેવો. પસંદગી પ્રમાણે કઢી જાડી કે પાતળી રાખી શકાય. પાતળી કઢી માટે થોડું વધારે પાણી ઉમેરવું.