முதலில் ஒரு டம்ளர் அரிசியை கழுவி அரை மணி நேரம் ஊற வைத்துக் கொள்ளவும்.காய்கறிகளை நன்கு கழுவி கொஞ்சம் பெரிய சைஸில் அறிந்து கொள்ளவும். பொடியாக அறிந்தால் சாதம் வேகும்போது காய் குழைந்து விடும். 15 சின்ன வெங்காயத்தை தோல் உரித்துக் கொள்ளவும். பின்பு தக்காளியை பொடியாக அரிந்து கொள்ளவும். ஒரு சிறிய எலுமிச்சை அளவு புளியை ஊற வைத்துக் கொள்ளவும். கால் டம்ளர் துவரம்பருப்பை மஞ்சள்தூள், 1/4 ஸ்பூன் விளக்கெண்ணெய் சேர்த்து குக்கரில் 4 சவுண்ட் விட்டு வேக வைத்துக் கொள்ளவும்.

4 வர மிளகாய், ஒரு ஸ்பூன் கடலைப்பருப்பு, ஒரு ஸ்பூன் வரக்கொத்தமல்லி, அரை ஸ்பூன் வெந்தயம், அரை டீஸ்பூன் உளுத்தம்பருப்பு, ஒரு ஸ்பூன் சீரகம், ஒரு ஸ்பூன் எள்ளு, ஒரு ஸ்பூன் கசகசா இவற்றை ஒரு ஸ்பூன் எண்ணெய் சேர்த்து சிவக்க வறுத்துக்கொள்ளவும். பிறகு அதிலே 4 ஸ்பூன் தேங்காய் துருவலை சேர்த்து வறுத்துக் கொள்ளவும். இவற்றை மிக்ஸியில் நைசாக அரைத்துக் கொள்ளவும்.

குக்கரில் ஒரு ஸ்பூன் நெய் விட்டு, அதில் ஒரு பட்டை, கிராம்பு சேர்த்து கடுகு பெருங்காயம் தாளித்துக் கொள்ளவும். பிறகு சின்ன வெங்காயம்,தக்காளி பொடியாக அரிந்தது சேர்த்து 2 நிமிடம் வதக்கி எல்லா காய்கறிகளையும் சேர்த்து வதக்கவும். மேலும் இதில் கத்திரிக்காய் பட்டாணி போன்ற காய்கறிகளும் இருந்தால் சேர்த்துக் கொள்ளலாம்.

இப்போது வெந்த துவரம் பருப்பை சேர்க்கவும். பருப்புத் தண்ணீர் ரசதிற்கு வேண்டும் என்றால் எடுத்துக் கொள்ளலாம். பிறகு ஊற வைத்த அரிசியை சேர்க்கவும். நன்கு கலந்துவிட்டு தேவையான உப்பு சேர்க்கவும். ஒரு டம்ளர் அரிசிக்கு 4 டம்ளர் தண்ணீர் சேர்க்கவும்.பருப்புத் தண்ணீர் சேர்த்துக் கொள்வது என்றால் அதற்கு தகுந்தாற் போல் தண்ணீர் சேர்த்துக் கொள்ளவும். இவகளை நன்கு கலந்து விட்டு குக்கரை மூடி வைக்கவும். 2 விசில் விட்டு பிறகு சிம்மில் மேலும் 10 நிமிடம் வைக்கவும்.

இப்போது புளியை கரைத்துக் கொள்ளவும். குக்கரில் ஆவி அடங்கியதும் திறந்து சாதம் குழைய வெந்து விட்டதா என்று பார்க்கவும். பிறகு அதில் புளித்தண்ணீர் சேர்க்கவும்.

கரண்டியில் நன்கு கலந்து ஒரு 5 நிமிடம் விடவும். கடைசியாக இரண்டு ஸ்பூன் தூய நல்லெண்ணெய் சேர்க்கவும் பிறகு அறிந்த கறிவேப்பிலை கொத்தமல்லி சேர்த்து அலங்கரிக்கவும். சாம்பார் சாதத்துடன் வடகம் அல்லது அப்பளம் தொட்டு சாப்பிட சுவையாக இருக்கும்.