செட்டிநாடு சொக்கரப்பான்

பச்சை அரிசி, புழுங்கல் அரிசி, வெள்ளை உளுந்து இவற்றை கொடுக்கப்பட்ட அளவுகளில் தனித்தனியே எடுத்துக் கொண்டு, நன்கு கழுவி மூழ்கும் அளவு தண்ணீர் ஊற்றி 2 முதல் 3 மணி நேரங்கள் ஊற வைக்கவும்

ஒரு முழு தேங்காயை உடைத்து துருவலாக துருவி எடுத்துக் கொண்டு, அதனுடன் ஏலக்காய் எடுத்துக் கொள்ளவும். சுத்தமான ஆர்கானிக் மண்டை வெல்லத்தை தட்டி எடுத்துக்கொள்ளவும்.

இப்போது கிரைண்டரில் முதலில் உளுந்தை சேர்த்து சிறிது சிறிதாக தண்ணீர் தெளித்து சிறிது கெட்டி பதமாக அரைத்து தனியே ஒரு பாத்திரத்தில் எடுத்துக் கொள்ளவும். பிறகு இரண்டு அரிசியை ஒன்றாக கிரைண்டரில் சேர்த்து, அதனுடன் தேங்காய், ஏலக்காய், பொடித்த வெல்லம் சேர்த்து முக்கால் பதமாக அதாவது சிறிது கரகரப்பாக இருக்குமாறு, சிறிது கெட்டி பதமாக அரைத்து எடுத்துக் கொள்ளவும்.

இப்போது அரிசியுடன் உளுந்தையும் சேர்த்து நன்கு ஒரு சேர கையால் கரைக்கவும். இட்லி மாவு பதத்திற்கு இல்லாமலும், தோசை மாவு பதத்திற்கு இல்லாமலும், இடைப்பட்ட பதத்திற்கு நன்கு கரைத்துக் கொள்ளவும்

இப்போது கடாயில் நன்கு தாராளமாக எண்ணெய் விட்டு காய்ந்ததும் ஒரு குழிக் கரண்டியால் எடுத்து எண்ணெயில் ஒரே அளவாக ஊற்றவும்

அடுப்பை குறைத்து வைத்து திருப்பி திருப்பி விட்டு நன்கு பொன்னிறமாக வந்ததும் எண்ணெய் வடித்து எடுக்கவும். இதேபோல் எல்லா மாவையும் ஊற்றி நன்கு பொரித்து எடுக்கவும். செட்டிநாட்டு பலகாரங்களில் மிகவும் பிரசித்தி பெற்றது இந்த சொக்கரப்பான். மிக மிக ருசியாக இருக்கும்.