ફરાળી કચોરી બનાવવા માટે એક બાઉલમાં બટાકાને મેશ કરી લેવા ત્યારબાદ તેમાં થોડું મીઠું નાખી સાબુદાણા અને મોરૈયા નો પાઉડર ઉમેરો. ઉપરનું પડ તૈયાર છે

હવે એક બાઉલમાં છીણેલું કોપરું, સિંગદાણાનો ભૂકો, કાજુ,દ્રાક્ષ, લીંબુનો રસ, ખાંડ, મીઠું, ધાણાભાજી અને આદુ મરચાની પેસ્ટ નાંખી બધું મિક્સ કરી લેવું.હવે તેમાં થોડું પાણી ઉમેરવું જેથી તે ડ્રાય ના થઈ જાય.

હવે આ બનાવેલા બટાકાના મિશ્રણમાંથી થેપલી જેવું હાથમાં લઇ વચ્ચે સ્ટફિંગ મૂકી ફરતી કોર બંધ કરી કચોરી જેવું બનાવી લેવું.

હવે તેલ ગરમ મૂકી ધીમા તાપે આ કચોરી બ્રાઉન થાય ત્યાં સુધી તળી લો. હવે આ કચોરી પર થોડી ગ્રીન ચટણી મીઠી ચટણી અને ટોપરાનું છીણ નાખી ગાર્નીશિંગ કરવું

સાબુદાણાની ખીચડી માટે સાબુદાણાને પાણીમાં 3--4 કલાક પલાળી પછી તેને સારી રીતે ધોઈને યુઝ કરવા.હવે એક પેનમાં તેલ ગરમ મૂકી તેમાં જીરુ આદુ-મરચાની પેસ્ટ લીમડાના પાન અને હિંગ નાખી તેમાં સાબુદાણા નાંખી દેવા. હવે તેમાં આદુ મરચાની પેસ્ટ, મીઠું, લીંબુનો રસ, સીંગદાણાનો ભૂકો અને ખાંડ નાખી સારી રીતે હલાવી ચાર પાંચ મિનિટ સુધી ચડવા દેવું. તો તૈયાર છે સાબુદાણાની ખીચડી...

સૌપ્રથમ એક બાઉલમાં પલાળેલા સાબુદાણા લઈ તેમાં દૂધ અને ખાંડ ઉમેરી સાબુદાણા દૂધ સાથે એકરસ થઈ જાય ત્યાં સુધી ઊકળવા દેવું સાબુદાણા સરસ ચડી જાય એટલે સાબુદાણાની ખીર તૈયાર છે..

ફરાળી મીઠી ચટણી બનાવવા માટે કુકરમા ખજૂર-આંબલી લઈ તેમાં ગરમ મસાલો ધાણાજીરું, મીઠું, લાલ મરચું પાઉડર,આદુ મરચાની પેસ્ટ નાખી એક સીટ લગાવી દેવી.હવે થોડી ઠંડી થાય એટલે તેને મિક્સરમાં પીસી લેવું તો તૈયાર છે ફરાળી મીઠી ચટણી...

ફરાળી ગ્રીન ચટણી બનાવવા માટે એક મિક્સર જારમાં ધાણા ભાજી, આદુ મરચાં, મીઠું, લીંબુનો રસ, ખાંડ અને સીંગદાણા નાખી પીસી લેવું.

સુકી ભાજી માટે એક પેનમાં તેલ ગરમ મૂકી તેમાં તેલ નાખી દેવુ. ત્યારબાદ તેમાં જીરુ લીમડાના પાન આદું મરચાની પેસ્ટ નાખી બટાકા નાખવા. હવે તેમાં હળદર, ગરમ મસાલો, લાલ મરચું પાઉડર, મીઠું અને લીંબુનો રસ નાખી સારી રીતે બધું હલાવી બેથી ત્રણ મિનિટ સુધી થવા દેવું. સુકી ભાજી તૈયાર છે.

બટાકાની કતરણ અને સીંગદાણા મિકચર બનાવવા માટે બટાકા ની કતરણ અને કાચા સીંગદાણા તળી લેવા ત્યારબાદ તેમાં લાલમરચું, ધાણાજીરું,ખાંડનો પાઉડર અને મીઠુ નાખી મિક્સ કરી લેવું.

તૈયાર છે આપણી ચટાકેદાર ફરાળી પ્લેટ...