பூந்தி பக்கோடா குருமா

பூந்தி செய்வதற்கு:- ஒரு பாத்திரத்தில் அரை கப் கடலைமாவு சிறிதளவு உப்பு மற்றும் தனி மிளகாய் தூள் சேர்த்து தோசை மாவு பதத்துக்கு தண்ணீர் ஊற்றி கரைத்துக் கொள்ளவும். ஒரு கடாயில் எண்ணெய் காயவைத்து அதன் மேல் ஒரு ஜல்லி கரண்டி பிடித்து கலந்துள்ள மாவை சிறிது சிறிதாக ஊற்றி ஒரு தட்டு தட்டினால் சிறு சிறு பூந்திகளாக விழும் இதனை பொரித்து எடுத்து வைத்துக் கொள்ளவும்.

பக்கோட செய்வதற்கு:- ஒரு பாத்திரத்தில் ஒரு கப் கடலை மாவு, கால் கப், அரிசி மாவு,ஒரு பெரிய வெங்காயம் பொடியாக நறுக்கியது, ஒரு பச்சை மிளகாய் பொடியாக நறுக்கியது, சிறிதளவு கொத்தமல்லி, கருவேப்பிலை நறுக்கியது,சிறிய இஞ்சி துண்டு மற்றும் 2 பூண்டுப் பற்கள் தட்டிக்கொண்டு 2 டேபிள் ஸ்பூன் சூடான எண்ணெய் ஊற்றி தேவையான அளவு உப்பு மற்றும் தண்ணீர் சேர்த்து கட்டியாக பிசைந்து ஒரு கடாயில் தேவையான அளவு எண்ணெய் ஊற்றி சிறு சிறு உருண்டைகளாக எண்ணெயில் போட்டு பொரித்து எடுத்துக் கொண்டால் பக்கோடா தயார்.

குருமா செய்வதற்கு:- ஒரு கடாயில் எண்ணெய் ஊற்றி நறுக்கிய பெரிய வெங்காயம், தக்காளி,தேங்காய்,இஞ்சி பூண்டு, கசகசா, முந்திரி,பச்சை மிளகாய் சேர்த்து பச்சை வாசனை போகும் வரை வதக்கி எடுத்து ஆறிய பின் மிக்ஸி ஜாரில் போட்டு மைய அரைத்து வைத்துக் கொள்ளவும்.அதே கடாயில் எண்ணெய் ஊற்றி பெருஞ்சீரகம், பட்டை, கிராம்பு, ஏலக்காய்,ஜாதிபத்திரி, பிரிஞ்சி இலை, மஞ்சள்தூள் தேவையான அளவு உப்பு மற்றும் அரைத்து வைத்த மசாலாவுடன் சிறிதளவு தண்ணீர் ஊற்றி நன்கு கொதிக்க விடவும்.

நன்கு கொதித்து பிறகு பொரித்து வைத்துள்ள பூந்தி மற்றும் பக்கோடாவை சேர்த்து ஒரு கொதிவிட்டு இறக்கினால் கமகமக்கும் வாசனையுடன் சுவையாக பூந்தி பக்கோடா குருமா தயார். இதனை கலந்த காய்கறி பிரிஞ்சி உடன் சேர்த்து சாப்பிட மிகவும் அலாதியாக இருக்கும்.