முதலில் இரண்டு பெரிய சைஸ் உருளைக்கிழங்கை கழுவி நீளவாக்கில் நான்காக அறிந்துகொள்வோம்.காய்ந்த பச்சை பட்டாணி ஆக இருந்தால் முதல் நாள் இரவே ஊறவைத்து கொள்ளவும். ஃப்ரெஷ் பச்சைப் பட்டாணி யாக இருந்தால் நேரடியாக சமையலில் சேர்த்துக் கொள்ளலாம். நான் இன்று ஊறவைத்த பட்டாணியை சேர்த்துக் கொண்டேன். ஊற வைத்த பட்டாணி என்பதால் உருளைக்கிழங்கு பட்டாணி இரண்டையும் ஒன்றாக நான் குக்கரில் வேக வைத்துக் கொண்டேன்.

6 பல் பூண்டு தோலுரித்து கொள்ளவும். 5சின்ன வெங்காயத்தை தோல் உரித்துக் கொள்ளவும். ஒரு இன்ச் அளவு இஞ்சியை தோல் சீவி நறுக்கிக் கொள்ளவும். ஒரு கப் அளவு தேங்காய் துருவி கொள்ளவும். இரண்டு பச்சை மிளகாய் ஒரு ஸ்பூன் கசகசா எடுத்து வைத்துக் கொள்ளவும். ஒரு ஸ்பூன் சோம்பு எடுத்துக் கொள்ளவும்.

மேற்கூறிய எல்லா பொருட்களையும் மிக்ஸியில் பச்சையாக அரைத்துக்கொள்ளவும். ஒரு பெரிய வாணலியில் 2 ஸ்பூன் எண்ணெய் சேர்த்து அதில் ஒரு பிரிஞ்சி இலை ஒரு பட்டை இரண்டு ஏலக்காய் 3 லவங்கம் சேர்த்து வதக்கவும். பிறகு அதில் நீளவாக்கில் அரிந்த ஒரு பெரிய வெங்காயத்தையும் அரிந்த 6 பச்சை மிளகாய் சேர்க்கவும்.

வெங்காயம் நன்கு சிவந்தவுடன் அரைத்த விழுதை அதில் சேர்த்து பச்சை வாசம் போகும் வரை நன்கு வதக்கவும். ஃப்ரெஷ் பச்சைப்பட்டாணி ஆக இருந்தால் இப்போது அதில் சேர்க்கவும். கொஞ்சம் தண்ணீர் சேர்த்து 5 நிமிடம் மூடி வைத்து வெங்காயம் பட்டாணி வேக விடவும். தேவையான உப்பு சேர்த்துக் கொள்ளவும்.

வேகவைத்த உருளைக்கிழங்கை தோல் உரித்து பெரிய அளவில் கட் செய்து கொள்ளவும். இதை குருமாவில் சேர்த்துக் கொள்ளவும்.தேவையான தண்ணீர் சேர்த்து 5 நிமிடம் வரை மூடி வைத்து கொதிக்க விடவும். கடைசியாக அரிந்த புதினா மற்றும் கொத்தமல்லி இலைகளை சேர்த்து கொள்ளவும்.

சுவையான உருளைக்கிழங்கு பட்டாணி வெள்ளை குருமா தயார். சப்பாத்தி, பூரி மற்றும் சாப்பாட்டிற்கு சுவையாக இருக்கும்.