உருளைக்கிழங்கு கேரட் பூரிமசாலா

தேவையான பொருட்களை எடுத்து வைத்துக் கொள்ளவும்.கேரட்டை துருவி எடுத்துக் கொள்ளவும்.

உருளைக்கிழங்கை குக்கரில் போட்டு 4 விசில் விட்டு வேக வைத்து தோலுரித்து மசித்து வைத்துக் கொள்ளவும்.

அடுப்பில் ஒரு கடாயை வைத்து 1 ஸ்பூன் எண்ணெய் ஊற்றி எண்ணெய் சூடானதும் கடலைப்பருப்பு, சோம்பு போட்டு தாளிக்கவும்.

பிறகு கடுகு போட்டு தாளிக்கவும். பிறகு நீளவாக்கில் கீறிய பச்சைமிளகாய், நீளவாக்கில் நறுக்கிய பெரிய வெங்காயத்தை போட்டு வதக்கவும். பிறகு துருவிய கேரட்டை அதில் போட்டு 1 நிமிடம் வதக்கவும்.

பிறகு பொடியாக நறுக்கிய தக்காளியை போட்டு வதக்கவும்.பிறகு மசித்து வைத்த உருளைக்கிழங்கு,1/4 ஸ்பூன் மஞ்சள்தூள், தேவையான அளவு உப்பு போட்டு 1நிமிடம் வதக்கவும்.

பிறகு அதில் 2 டம்ளர் தண்ணீர் ஊற்றி 1 நிமிடம் கொதிக்க விடவும்.கொதி வந்தவுடன் 1 ஸ்பூன் கடலை மாவை தண்ணீரில் கரைத்து மசாலாவில் ஊற்றி மூடி வைத்து வேக விடவும்.

நன்கு கெட்டி பதம் வந்தவுடன் கொத்தமல்லி இலை தூவி ஒரு கிளறு கிளறி பிறகு பரிமாறவும்.